Raset er 50 meter langt og 8-10 meter på det høgste. Vegen vil ikkje opne att i dag.
Vegmeldingssentralen har ikkje full oversikt over raset, men seier at det førebels ikkje ser ut til at personar er kome til skade.
Operasjonsleiar Per Rimmen seier at politiet i Lærdal er på staden.
- Det er lite sannsynleg at nokre er tekne av raset, men veret gjer at det ikkje er forsvarleg å byrje å rydde raset i kveld. Vi håpar på å få rydda opp så raskt som mogleg, men sikkerheiten kjem fyrst, seier han.
Utan telefondekning
Både fasttelefonnettet og mobilnettet er nede i Gudvangen.
- Vi har store problem med å få tak i folk i området på grunn av at telefon-nettet er nede. Men vi har fått stadfesta at raset er større enn dei som har kome der før, seier vaktoperatør Kjetil Molvær ved vegmeldingssentralen.
Ras og flaum
Årsaka til raset er store mengder nedbør den siste tida.
Ei vakt stoppar trafikken på E16 ved Gudvangen.
Foto: Arne VeumDet har også rasa mellom Stalheim og Sivletunnelen, og vegen vart stengd. Vegen her er no open for fri ferdsel.
I tillegg er det flaum ved Skromle bru mellom Tvinde og Sundve. Her er vegen open for store køyrety. Personbilar får ikkje passere på grunn av at det er 49 centimeter vatn i vegbana.
Raste nedover fjellsida
Arne Bakkedal var på veg mot Voss då han vart augevitne til raset som gjekk like før klokka 15.
- Vi kom køyrande og det regna voldsomt. Eg måtte slakke ned farten for eg såg ikkje vegen. Då eg kom rundt ein sving måtte både eg og ein annan bil bremse. Det låg steinar i vegen og vi såg at det kom steinar som raste nedover fjellsida. Trea vart lagt flate og vegen sperra.
Onsdag føremiddag skal ein geolog opp i helikopter for å undersøkje rasstaden. Det er førebels uvisst kor tid vegen kan opnast.