Aker Solutions på Stord mista storkontrakten til Goliatfeltet.
Totalt ville kontrakten gitt 7000 årsverk og verftsarbeidet skulle gjerast på Stord og i Egersund.
Kontrakten har ein estimert kontraktsverdi på 6,9 milliardar.
I ei pressemelding skriv ENI Norge at «På bakgrunn av grundig vurdering av både tekniske og kommersielle kriterier, ble det mest konkurransedyktige tilbudet valgt».
Stor prisforskjell
Det var det koreanske selskapet Huyndai Heavy Industries som vann anbodet, og dei kunne stille med ein prisforskjell på 30 % i forhold til konkurrenten Aker.
Klubbleiar ved Aker Solutions på Stord, Rune Rafdal, peikar mot skittent spel i anbodskonkurransen.
– Det er alltid farleg å seie slikt, men sjølvsagt, dersom det er ein slik prisforskjell, så er det lett å tenkje i dei banar, seier han.
Han fortel at 70-80 % av utgiftene i slike prosjekt ofte går til innkjøp, og det koster det same om ein byggjer det i Noreg eller i Korea.
– Då står ein igjen med 20-30 %, og at prisforskjellen då skal vera så enorm, tykkjer eg er veldig merkeleg.
– Må følgje opp
No håper han politikarane vil sjå til at internasjonale spelereglar vert følgde.
– Eg håpar dei tek ansvar for å verkeleg følgje opp at dette er ein reell konkurranse, seier han.
Håper på neste kontrakt
Verftet på Stord har arbeid med Gjøa-feltet ut 2010. Etter det har dei ikkje noko på blokka. I verste fall kan det føre til permisjonar. Men sjølv om stemninga på veftet er trykka, vil ikkje Rafdal sjå for mørkt på framtida.
– Det er akkurat som når ein tapar ein fotballkamp. Ein har enda meir lyst til å vinne neste gong.
No rettar han fokuset mot kontrakten på Jasmin-feltet, som skal avgjerast i april.