Gro Helleland som er leiar i Vik Røde Kors Hjelpekorps seier til Sogn Avis at familien gjorde alt rett då raset gjekk måndag ettermiddag. Medan barn leika i snøen heldt foreldre eit vake auge med dei, og dei handla raskt då snømassane losna.
– Alle som blir tekne av ras og overlever, er heldige, seier Helleland til Sogn Avis.
- LES OGSÅ:
– Utfallet kunne blitt annleis
Meldinga om flakskredet på Vikafjellet kom til politiet like over klokka 15 måndag. Berre minuttar seinare var guten som var teken av det greven ut.
Ifølgje politiet vart guten funnen halvannan meter nede i hardpakka snø, og takka vere god innsats frå dei som var i nærleiken gjekk det bra.
Ifølgje Sogn Avis var det også to andre barn som vart tekne av raset, men desse flaut oppå snøen og kunne sjølv peike ut området der 12-åringen var. Helleland i Røde Kors Hjelpekorps meiner det var svært viktig at ein hadde med seg spade.
– Enorme krefter er i sving og sjansen er stor for at vedkommande blir knust. Utfallet kunne blitt ganske annleis om spaden ikkje var med i sekken, seier Røde Kors-leiaren til Sogn Avis.
– Bruk det med vit
Onsdag er det meldt om snøskredfare 2 i både Sogn, Sunnfjord og Nordfjord ifølgje Varsom.no. Snøskredfare 2 svarar til moderat snøskredfare og det kan vere lokalt ustabile forhold.
Med flott vêrmeldingar er det mange som blir lokka til fjells, og Helleland seier til Sogn Avis at folk for all del må bruke fjellet, men at det er viktig å gjere det med vit.
Eit anna råd kan vere å følgje regelen følg rygg og vêr trygg, seier ho til avisa.