– Vasstanden er den viktigaste. Laurdag blir den opp mot 85 centimeter over det som er oppgitt i tabellen over flod og fjøre, seier vakthavande statsmeteorolog ved Vêrvarslinga på Vestlandet, Trond Thorsteinsson.
Det betyr med andre ord at vatnet kan komme 1,25 meter over vanleg nivå, noko som på dei rette stadane kan komme til å merkast godt.
– Det kan gjere store skadar, så det er viktig at folk brukar hovudet, seier Thorsteinsson.
Meteorologisk institutt har sendt ut OBS-varsel for fylka Rogaland og Hordaland, Sogn og Fjordane, Møre og Romsdal, Trøndelag, Vest-Agder, Aust-Agder, telemark, Buskerud, Vestfold, Østfold, Oslo, Akershus og Oppland.
Fare for torevêr
– Det blir haustleg vêr i helga med mykje vind og regnbyer. Over 600–800 meter kjem nedbøren som snø, og fredag er det fare for torevêr, seier Thorsteinsson.
Fredag er det venta kraftig vind i Sogn og Fjordane og Møre og Romsdal, og det er venta vanskelege køyreforhold i fjellet på Vestlandet. Sør for Stad på Vestlandet er det venta lokalt mykje nedbør.
Fredag og laurdag ventar ein høg vasstand på kyststrekninga Egersund-Rørvik.
Blæs godt i høgfjellet
For reisande som har tenkt seg over ein av dei mange høgfjellsovergangane i landet, kan det vere lurt å vere godt budd.
– Køyreforholda vert ikkje kjempegode, for å seie det slik. Det blir snøbyer i kombinasjon med mykje vind både fredag og laurdag, seier Thorsteinsson.
Fredag ligg vinden på sørvest stiv kuling, på Stad opp mot liten storm.
– Så guffar det på att litt i natt frå sørleg retning. Frå laurdag føremiddag vert det vestleg sterk kuling utsette stadar. I kombinasjon med snøforholda blir ikkje køyreforholda dei beste, seier Thorsteinsson.
Han er klar på at ein iallfall bør ha skodd seg rett.
– Her må ein ha vinterdekk. Elles kan ein like godt halde seg heime, seier Thorsteinsson.