Aker Yards har inngått avtale med Kleven Maritime om å betale 60 millionar kroner for dei to selskapa, går det fram av ei børsmelding.
Omsetnaden ved Kleven Florø og Kleven Design var om lag 350 millionar kroner i 2005. Ordreboka ved overtaking utgjer ein juicetankar og to kjemikalietankarar til ein samla verdi av om lag 1,3 milliardar kroner.
- Oppkjøpet av Kleven Florø kombinert med joint venture-avtalen med Damen Shipyard Group i Ukraina gir oss ein unik posisjon som konkurransedyktig leverandør innan avanserte spesialtankskip, seier Karl Erik Kjelstad, konsernsjef i Aker Yards i meldinga.
Over 300 tilsette
Kleven Florø sine avdelingar i Førde og Florø har omlag 300 tilsette, i tillegg til 30 ingeniørar ved Kleven Design.
- Eg er svært nøgd med at Kleven Florø og Kleven Design som ein del av Aker Yards, får eigarar som vil dra nytte av og byggje vidare på den unike kompetansen og det potensialet som har blitt bygd opp over fleire tiår. Det seier Kjersti Kleven som er styreformann i Kleven Maritime.
Stor glede
Både leiinga og dei tilsette på Kleven er svært positive til at Røkke sitt selskap kjøper opp verksemda. Dei 330 tilsette i Førde og Florø blir no ein del av ei verksemd med over 40.000 tilsette.
Tillitsvald ved Kleven, Audun Grønnevik, seier det var stor glede blant dei tilsette då kjøpet vart kjent i ettermiddag.
- Det har lenge vore snakk om at vi skulle ha ein investor, og no har vi endeleg fått det til. Eg trur det er ein fordel å bli med i eit så stort konsern, seier Grønnevik.
Kleven-direktøren positiv
Også direktør i Kleven Florø, Gustav Johan Nydal, tykkjer oppkjøpet er positivt for verftet.
- Dette støttar eg fullt ut. Vi har vore på jakt etter ein investor for å styrke kapitalen i selskapet og vi har no også ein fast samarbeidspartnar når det gjeld å byggje skrog til prosjekta våre. Dette gjer at det samla sett blir lettare både å få nye kontraktar og å vere konkurransedyktige, seier Nydal.
Kulen får ny stilling
Steinar S. Kulen, som i dag er konsernsjef i Kleven Maritime, skal leie aktivitetane for Aker Yards i marknaden for spesialiserte tankskip. I Aker vert han nestleiar for forretningsområdet handelsfarty.