Eit eige register skal gje oversikt over verv og økonomiske interesser dei folkevalde har. Men i 19 kommunar har ikkje politikarane registrert seg.
Ordførar i Jølster, Gerd Dvergsdal, seier ho har gløymt det.
- Eg tek sjølvkritikk og legg meg fullstendig flat. Eg har rett og slett gløymt å gjere det, men skal gjere det i dag.
Skapar openheit
Styrevervregisteret vart oppretta av KS for eit år sidan for å skape openheit rundt bindingane til politikerarar og kommunetilsette. Men nestleiaren i KS er ikkje den einaste som manglar i registeret.
I 19 av dei 26 kommunane i Sogn og Fjordane har ikkje dei folkevalde registrert seg.
Ordføraren i Stryn, Nils Støyva, er ein av dei som står i registeret.
- Eg er medlem av Helse Vest, styreformann i Reisemål Stryn og Nordfjord og så sit eg i to stiftingar
Ser ikkje poeng i å gjere det
Han har gjentekne gonger bede formannskapet om å registere seg - utan at noko har skjedd. Anders Magne Vik frå FrP seier han ikkje ser noko poeng i å registrere seg - han meiner det ikkje er av interesse for publikum.
Ordføraren derimot meiner det er viktig å vere open rundt dei bindingar han har.
- Eg tykkjer det er greitt å vere med i registeret og innbyggjarane får innblikk i kva slags verv eg har og kva eg driv med.