Med unntak av ei rute i Sogndal, har alle rutene eit snitt frå null til tre passasjerar.
- Oversikta vi fekk i dag viser at det kvart år blir køyrt 114 000 kilometer med null til tre passasjerar. Det er både veldig dårleg økonomi og eit veldig dårleg klimarekneskap, seier leiar i samferdsleutvalet Knut M. Olsen (Sp).
Etablerer serviceruter
- Eg trur det er viktigare å bruke desse kollektivtrafikkronene på ein måte der vesentleg fleire får bruke dei, held Olsen fram om dei to millionane i sparte kroner som følgjer med rutekutta.
For pengane skal i staden brukast på kommunale serviceruter der folk sjølve kan bestille henting og transport.
Reservert tilhengar
Då samferdsleutvalet handsama saka i dag, var det langt mellom motstanden. Men Trude Brosvik (KrF) var mellom dei meir reserverte tilhengarane.
- Det er ein del av desse rutene det ikkje står alternativ bak. Dei er faktisk skattebetalarar dei som bur langt ute i distriktet, men som ikkje kan fylle opp ein buss og reise veldig ofte. Når det ikkje er noko alternativ for offentleg transport, så har eg eit hjarte som bankar for dei, seier ho.
Må bruke meir
Brosvik trur servicerutene er eit godt alternativ for eldre, men ikkje for ungdomar. Olsen insisterer på at sparing ikkje var føremålet med kutta. Truleg vil fylkeskommunen bruke meir pengar på å bygge opp att servicerutene i alle kommunar.
- Målsetnaden er å få dette til i alle kommunar. Då må ein spe på med noko meir pengar, men det vil variere frå kommune til kommune, seier han.