Ønskjer pengestøtte i SMS-aksjon

Arbeidarpartiet sin ordførarkandidat i Vågsøy, Kristin Maurstad, er ein av mange nordfjordingar som dei siste dagane har fått ei tekstmelding frå Sjukehusaksjonen.

Teksten har ein tittel som oppmodar folk om å bli medlem i sjukehusaksjonen. Her orienterer aksjonen om at styremedlemmer og vararepresentantar over ein treårsperiode går inn med 3600 kroner som skal gå til å betale advokatutgifter.

I teksten vert mottakaren oppmoda om å sende vidare til så mange som mogleg på SMS og e-post.

Meiner det er useriøst

Ordførarkandidat Kristin Maurstad oppfatta skrivet som ei oppmoding om å setje inn 3600 kroner.

– Det var ein tekst som fortalde om sjukehusaksjonen i Nordfjord, og som bad meg om å setje inn 1200 kroner per år i tre år, altså 3600 kroner på eit kontonummer. Det var underskrive sjukehusaksjonen i Nordfjord, men ikkje med noko personnamn, fortel Maurstad til NRK.

• LES OGSÅ: Trugar med å saksøke Helse Førde

På sin eigen Facebook-profil stemplar ho dette som useriøst og ho stiller no store spørsmål med framgangsmåten til aksjonsgruppa.

– Eg stiller spørsmål ved om folk faktisk er klar over kva pengane konkret skal gå til og eg reagerer på framgangsmåten, seier Maurstad.

(Artikkelen held fram under biletet)

Tykkjer ho bør ha råd

Styremedlem i Sjukehusaksjonen, Jan Eide, går på si side med breisida ut og meiner at såpass bør ein ordførarkandidat ha råd til.

– 1200 kroner går til rettssak. Om ho ikkje har råd til det, så har jo ikkje råd til å vera ordførar i Vågsøy heller. Det verkar litt rart at ho er kritisk til ein slik aksjon. Eg fattar det ikkje, ho burde heller stå på barrikadane ho også, slår Eide fast.

Sjukehusaksjonen i Nordfjord varsla nyleg at dei vil gå til rettssak for å stogge det dei meiner er ei nedbygging av sjukehustilbodet på Eid.

LES OGSÅ: Brukte 250 000 kroner på advokatar

Vil få vurdert framgangsmåten

Pengane dei får inn på SMS-aksjonen skal gå til å betale advokatutgifter. Med timeprisar på advokattenester på opp til 2000 kroner timen, er aksjonsgruppa heilt avhengig av den støtta dei kan få.

– Dette er slett ikkje rart, skal vi greie å redde sjukehuset så må vi stå på som berre f.. no, meiner Jan Eide.

Ap-kandidat Kristin Maurstad på si side er svært skeptisk.

– Eg undrast og vil gjerne få oppklara om dette er ein korrekt måte, konkluderer Maurstad.

Les utdrag av teksten i SMS'en her:

(NRK har rutinemessig teke bort informasjon vedrørande kontonummer)