Den unge stryningen kjem heim frå VM i skiskyting med fem medaljar – tre gull og to bronse.
Nordfjord Kjøtt som har hatt logoen sin på børsa til skiskyttaren, kan også tene gode pengar på suksessen.
- Dette har verdi fordi eksponeringa av reklamen gjer det meir truleg at folk vil føretrekkje dette produktet framfor andre, seier reklameekspert, Hans Mathias Thjømøe.
- LES OGSÅ:
Har sponsa Tarjei i fleire år
Millionar av sjåarar fekk sjå det på TV då Tarjei Bø skaut seg til gull i VM i Sibir. Og det ikkje berre ein gong, men tre.
Medan 22-åringen sjølv let tårene trille etter den første verdsmeistertittelen, kunne stolte sponsorar gni seg i hendene heime i Stryn.
For på sida av gullbørsa står logoen til Nordfjord Kjøtt.
- Vi har sponsa han i fleire år. Det er ganske utruleg at ein så ung mann kan gjere det så bra, så tidleg, seier dagleg leiar Geir Egil Roksvåg i Nordfjord Kjøtt stolt.
- LES OGSÅ:
(Artikkelen held fram under biletet)
Kan ha skote gullfuglen
Tjømøe er ekspert på sponsing og effekten av sponsing. Han er ikkje i tvil om at Nordfjord Kjøtt har gjort lurt i å setje pengar på Bø.
- I tillegg til eksponering vinn dei på den andre mekanismen ved reklame, nemleg assosiasjonar. Profilen til skiskyttarane og Bø, og profilen til Nordfjord Kjøtt smittar over på kvarandre, forklarar reklameeksperten.
- LES OGSÅ:
- LES OGSÅ:
(Artikkelen held fram under biletet)
Trur Bø kan auke salet
At Tarjei Bø vart verdsmeister er ekstra gode nyhende for den lokale kjøttprodusenten.
- Det har mykje å seie at Bø vart verdsmeister. Han viser seg som endå flinkare enn før, og gullvinnarane vert også meir eksponert enn dei andre, seier Tjømøe.
- Kan ein vente at Nordfjord Kjøtt vil selje meir enn det dei gjorde før Tarjei Bø vart verdsmeister?
- Ja, men ikkje med ein gong. Det tar tid før ein ser effekten, så ein vil nok ikkje sjå den første halvår, men heller i andre halvår.
I Stryn er Roksvåg heilt klart på at dei vil fortsetje å sponse gullguten i kommunen.
- Det er heilt klart at vi vil, ja, seier Roksvåg.