Skipet går på eigen maskin tilbake, men med redusert fart. I tillegg er to slepebåtar i beredskap, dersom det skulle bli bruk for dei.
Foto: Arild Eskeland / NRKDet er 103 personar om bord i det nye gasskipet som fekk motorproblem og måtte stoppa utanfor Jæren sundag ettermiddag. Årsaka til stoppen var problem med gasstrykket til Rolls-Royce-maskinene.
Skipet gjekk frå Risavika ved Stavanger klokka 13.00 i dag, og skulle etter planen gå frå Hirtshals i kveld. Det var 45 minutt etter avgang danskebåten fekk motorproblem.
– Me har snudd og er på veg tilbake til Stavanger. Ferja klarer å gå på eigen maskin, men med redusert fart, sa administrerande direktør i Fjordline, Ingvald Fardal til NRK.no i 16-tida i dag.
I 17-tida kunne skipet legga til kai i Risavika.
– Me har nå bestemt at skipet blir liggande over natta, med passasjerane om bord. Avgangen frå Hirtshals tar skipet Bergenfjord seg av. Det er framleis uvisst om dette skal gå vidare til Bergen, seier Fardal.
Passasjerar som ønsker det kan få forlata båten, men dei som blir får matservering.
– Tax-Free-butikken er stengt, men dei skal sjølvsagt få mat, sjølv om tilbodet blir noko forenkla, seier Fardal.
Får rettleiing om bord
Ifølgje nettsida marinetraffic.com, som har sanntidsinformasjon, om skipsposisjonar var ferja like utanfor Hellestø-stranda då det fekk motorproblem. Klokka 16.15 kom det to slepebåtar til, som følgde skipet tilbake til Risavika.
– Rolls-Royce hjelper oss med å finna ut kva som har skjedd. Før me kjenner feilen er det uaktuelt å reisa til Danmark, fortel Fardal.
– Så ingen av passasjerane kjem seg til Danmark i dag?
– Det seier eg ikkje. Dersom me finn feilen, og er hundre prosent sikre, er me førebudde på å snu på ny.
MOTORPROBLEM: Den nye danskebåten M/S Stavangerfjord på veg tilbake til Risavika etter den fekk motorproblem utanfor Jæren.
Foto: Arild Eskeland / NRKNytt skip
Sjølv om Stavangerfjord fekk motorstopp, dreiv det ikkje utan kontroll. Skipet har motorkraft nok til å legge seg mot bølgjene.
– Vi prøvar å ligge så stille vi kan, og vi kan framleis manøvrere. Det er ingen stor dramatikk i det. Det einaste konsekvensen er at motorproblema vil føre til forseinkingar for våre passasjerar, sa Fardal til NRK.no tidlegare i dag.
Fardal seier at dei i tillegg har ekstramotorar som går på dieselolje, desse har det framleis ikkje vore nødvendig å setja inn i drift. Som ei siste løysing kan dei også ankra opp.
Det er fire meter bølger utanfor Jæren nett nå.
Skipet har ei lengde på 170 meter og har i sommarsesongen plass til 1.500 passasjerar. Skipet trafikkerer linene Bergen–Stavanger–Hirtshals og Hirtshals–Langesund.
M/S Stavangerfjord er heilt ny og hadde jomfruturen sin i midten av juli i år.
- LES OGSÅ: Stavangerfjord på jomfrutur
- LES OGSÅ: Norsk gigantskip sjøsett i Polen