Rotevatn var på tokt saman med Statens naturoppsyn for å finne ulovlege garn i Nordfjord i Vestland fylke.
– Å fange villaks ulovleg er å rekne som grov miljøkriminalitet, seier Rotevatn.
Brått oppdagar Rotevatn og oppsynsmennene ein mistenkeleg fritidsbåt nær fjæresteinane.
– Dreg han garn? spør dei seg og tar opp kikkerten.
– Ja, pinade!, bryt båtføraren ut, medan Rotevatn lenar seg spent fram i styrehuset.
Etter å ha fotografert på avstand med telelinse, gir dei full gass mot hobbyfiskaren som står med ryggen til og drar garn.
Storaksjon
I desse dagar går det føre seg ein storaksjon der Statens naturoppsyn og Kystvakta leitar etter ulovlege garn. Kontrollane vil halde fram utover sommaren.
– Vi kan ikkje vere overalt sjølvsagt, men folk skal vite at dei kan bli tatt, seier Stig Inge Hauge i SNO.
Fiskaren dei møter er tydeleg overraska over å sjå naturoppsynet, miljøvernministeren og NRK.
– Eg er ute og følgjer med på korleis Statens naturoppsyn jobbar, og dei jobbar tydelegvis godt, seier Rotevatn til fiskaren.
– Er eg den fyrste de har teke i dag?, spør den betutta fiskaren statsråden, og hevdar at han ikkje kan regelverket.
– Ja, enn så lenge, seier Rotevatn, medan Statens naturoppsyn halar garnet om bord i sin eigen båt.
Alvorleg miljøkriminalitet
Å finne ulovlege garn er som å leite etter nåla i høystakken, ofte er dei gøymde tett inn mot land.
Ulovlege garn i sjøen kan straffast med bøter på 20.000 kroner.
– Det er berre makrell i garnet, påpeikar fiskaren, utan at det endrar saka for Statens naturoppsyn. No må han møte på det lokale lensmannskontoret for å forklare seg.
Garn med maskevidde større enn 32 millimeter skal frå og med 1. mars til og med 30. september senkast, slik at fangstdelen står 3 meter under havoverflata, i fylgje Fiskeridirektoratet.
Fylkesmannen kan for heile fylket eller for avgrensa område, slik som i til dømes Sogn og Fjordane, bestemme at nedsenkingspåbodet skal gjelde for garn uansett maskevidde.
Alvorleg for villaksen her til lands
Mengda med atlantisk villaks som kjem inn frå havet er meir enn halvert sidan 1980-talet. No er det berre 500.000 villaks att, likevel har gytinga i elvane auka dei siste åra, truleg nettopp fordi ein har avgrensa fisket etter laksen.
– Situasjonen for villaksen er ganske alvorleg, det har også å gjere med lus og rømming frå oppdrettsanlegg, understrekar Rotevatn.
Fryktar gråmarknad for villaks
I fjor fann staten 480 slike ulovlege garn langs kysten, så langt i år aukar talet samanlikna med same tid i fjor. Nær 50 personar vart i 2019 melde til politiet.
Ifølgje Statens naturoppsyn er motiva til gjerningspersonane ulike. Nokre gjer det for å drive matauk, men somme gonger finn dei så mange garn at dei mistenker ein gråmarknad for den eksklusive villaksen.
– Fisket har vore eit stort problem, og er det framleis. Derfor har vi desse kontrollane, seier Stig Inge Hauge i Statens naturoppsyn.
Desto fleire laks som blir fanga i garn ute ved kysten, desto færre villaks får kome inn i elvane for å lage lakseungar gjennom å gyte.
– Problemet er at mange ikkje er klar over kor ille det står til med laksestammane, seier Rotevatn.
Statsråden seier dei jobbar med ei lovendring slik at straffene kan bli hardare.
– Vi må halde oppe talet kontrollar, og gjerne ha endå fleire.