I 2009 starta arbeidet med å etablere eit felles litteratur- og kulturnettverk med utgangspunkt i forfattarane Jakob Sande, Per Sivle, Olav H. Hauge, Rasmus Løland og Arne Garborg, som alle vart fødde eller budde langs Diktarvegen.
Torsdag opna diktarvegkonferansen i Balestrand.
- Diktarvegen kan bli eit middel for å nå andre mål, uttalte samferdsleminister Magnhild Meltveit Kleppa (Sp).
Ministeren la vekt på at Diktarvegen er ein god moglegheit for kommunane langs den indre stamvegen til å vise seg fram. Situasjonen i dag er at kommunane i endane av vegen, Sandnes, Forsand, Strand og Førde har vekst i folketalet - medan kommunane imellom har nedgang i folketalet.
- I den ytre stamvegen er det også andre krefter enn politikken som er naturlege pådrivarar. Difor er det ekstra viktig å gjere indre stamveg sterkare, sa Kleppa ifølgje ei pressemelding frå arrangøren.
Samferdsleministeren var også oppteken av rassikring av utsette strekningar langs Diktarvegen.