– Vi kan seie at nasjonen Norge ikkje gjer ein god nok jobb når vi ser at talet på personar som ventar på å kome ut i kommunane og starte integrering aukar. Det er om lag 3500 som sit i mottak og ventar på å kome i gang med integrering, seier Eide til NRK.
– Har gjort det dei kan
Berre i Sogn og Fjordane står 231 flyktningar i kø for å få seg bustad. Dei åtte kommunane som har sagt seg viljuge til å huse flyktningar, har berre funne bustad til 69. Helge Eide i KS meiner på si side at kommunane har gjort det dei kan, innanfor sine budsjett.
– Situasjonen her er som den er i resten av landet. Den er at kommuane gjer ein veldig god jobb i høve busetnad av flyktningar. Men behovet for busetnadsplassar frå flyktningar som har fått opphaldsløyve er enda mykje større enn kva kommunane greier å ta unna, seier Eide.
Ventar på bustad
På asylmottaket på Vassenden sit fleire som ventar på å bli busett i kommunane, ei av dei ei kvinne frå Syria.
– Eg ønskjer berre å fylle tida mi med noko positivt, men det er ikkje lett, seier kvinna til NRK.
Den syriske kvinna er ei av dei mange som har venta lenge. Men asylmottaket blir framleis bustaden hennar.
– Uroar meg litt
I nabokommunen Førde har ordførar Olve Grotle vanskar med å ta i mot fleire.
– Det uroar meg litt at vi alt i dag ikkje klarer å busetje meir enn tjue. Då trur eg vi skal vere litt realistiske i alle fall på litt kort sikt å busetje særleg fleire, seier Grotle.
Helge Eide i KS meiner at regjeringa må auke tilgangen på tilskot som kommunane kan nytte seg av.
– Det er eit verkemiddel som staten har moglegheit til å gjere noko med, og det er det såkalla bustadtilskotet som Husbanken disponerer. Der kan ein få inntil 20 prosent av investeringssummen til slike bustader, seier Eide.
Møter regjeringa
Han meinar at det kan aukast for å gje ein sterkare stimulans og ein auka reell moglegheit for kommunen å skaffe dei bustadane som er naudsynte for å sikre varig busetnad. Dette kravet fremjar KS når dei møter regjeringa i neste veke.
– Dette er eit verkemiddel som statlege instansar og meinar er rett å bruke, sler KS-direktøren fast.