Skøytetalenta deltok denne helga på landsmeisterskapen i skøytesportens mekka, Vikingskipet på Hamar.
Prestasjonane til Andreas Offerdal og Thomas Jerving skriv seg inn i historiebøkene som Lærdal sin beste sidan Finn Hauge entra pallen på 80-talet.
– Vi hadde nok endå større forventingar før helga, men med influensasjukdom onsdag var dei litt prega under kortdistansane laurdag. Søndag kvikna dei derimot til, fortel leiar i skøytegruppa, Tor Anders Offerdal.
Sletta rekordar
Etter 500 og 1.500 meter laurdag, kvikna dei to karane til gangs før søndagens 1.000 og 3.000 meter. På topp isforhold i hallen som neste helg tek imot Håvard Bøkko og resten av VM-løparane, låg alt til rette for aldersrekordar.
(Artikkelen held fram under biletet)
Jerving sette rekord på 1.000 meter, medan begge slo til med krinsrekordar 3.000. Jerving med 5.04,16 og Offerdal med 5.13,66.
– Og 1. helga i mars skal rekordane justerast igjen når vi reiser tilbake til Vikingskipet og Sandefjordløpet. Gutane er godt trente, og trenar tre til fem gonger i veka uansett vêr, seier Tor Anders Offerdal.
Aktivt miljø
Skøytemiljøet i Lærdal er det einaste aktive i Sogn og Fjordane
Med kring 15 aktive løparar under 18 år som deltek i konkurransar, og 40–50 som deltek på karuselløpa på den gamle fotballbana midt i sentrum av bygda.
– Og hadde vi fått på plass skøytebana vi har planer om, så hadde det blitt suverene treningsforhold for både breidde og aktivitet, seier Offerdal. I over 20 år har lærdølane arbeidd for å få etablert ei permanent kunstisbane.
(Artikkelen held fram under biletet)
Ventar på bane
Kulturdepartementet har velsigna planane til mellom 20 og 25 millionar kroner, medan kommunen har eit prinsippvedtak frå 2011 om at bana skal etablerast.
På Jevnaker har dei jobba kortare tid for å få etablert skøytebane. Den vart opna i desember.
– Alt er klart, men frå kommunen, som truleg må inn med mellom tre og fem millionar kroner, har vi ikkje høyrt så mykje ifrå. Der etterlyser både vi og Skøyteforbundet svar på kva som skjer, seier Offerdal og avsluttar.
– Bana kjem nok, men det tek diverre litt lengre tid enn planlagt.