– Vi har bede om fire veker varetekt for sikta, seier aktor i saka, Inger Beth Fosse.
- Les også:
Truga flyplass med bombemelding
Tysdag kveld gjekk bombealarmen på Flesland og all flytrafikk vart stogga i over fire timar medan politiet arbeidde med saka.
Ei kvinne på 18 år frå Sunnfjord stod bak trusselen. Ho vart sett i arrest, og i Fjordane tingrett i dag bad altså aktor om at kvinna vert varetektsfengsla i fire veker.
– Det er spesielle vilkår i denne saka og vi meiner det er fare for at dette kan skje igjen, seier Fosse.
Sit langt inne å be om varetekt
– Kor alvorleg er saka?
– Det seier seg sjølv, saka har vore i media og det er ein alvorleg trussel ho har kome med. Men også tidlegare hendingar ho har vore involvert i meiner vi er alvorlege. Det vert stilt spørsmål om sikta er tilrekneleg. Og det vi ber om er ei prejudisiell observasjon av sikta.
– Kvinna er svært ung?
– Å be om fire veker for ei så ung kvinne sit langt inne for påtalemakta. Vi forklarer fire veker med at dette er naudsynt for å avverje liknande situasjonar. Og det er allereie sendt ei tiltaltebeslutning til tingretten der vi ber om å få fastsetja ei hovudforhandling. Og det gjeld liknande forhold som det vi såg no på Flesland, seier Beth Fosse.
Forsvarar Odd Bovim meiner saka ikkje høyrer heime i rettsapparatet i det heile.
– Varetekt er ikkje eigna i denne saka, og min klient meiner ho treng andre ting enn ei fengsling, seier Bovim.
Medisinsk personell må vurdere meiner forsvarer
Forsvararen meiner at vilkåra for straff ikkje er oppfylt, og at ein person si liding ikkje er eit godt nok argument for fengsling.
– Kva må då skje?
– Andre må finne ut av kva som kan vere ein riktig reaksjon for denne hendinga som til dømes medisinsk personell. Dei må heller vurdere dette og ikkje rettsapparatet.
– Kvifor?
– Det vil eg ikkje gå inn på saka
Erkjenner ikkje straffskuld
Kvinna har kome med trugslar tidlegare, og vedgår at det var ho som stod bak trusselen tysdag.
– Men ho vedgår ikkje straffskuld i saka.
– Kvifor ikkje?
– Eg meiner det er knytt til forholda i saka, seier Bovim.
– Har ho sagt noko om kvifor ho gjorde dette?
– Nei, det har ho ikkje.