For tiande året på rad kasta sokneprest Vidar Bjotveit og kullet med konfirmantar seg uti Jølstravatnet 1. påskedag. Påskeplasket er eit høgdepunkt for både prest og konfirmantar.
– I år var det 15 konfirmantar pluss meg som bada. Det er omlag halvparten av konfirmantane i Jølster.
Påskeglede og galskap
Dagen starta med gudsteneste i Helgheim kyrkje der konfirmantane gjekk i prosesjon, pynta alteret og las tekstane for dagen.
Tradisjonen med isbading har Bjotveit teke med seg frå Kirkenes der han var feltprest.
– Då eg byrja i Jølster starta eg opp med dette og sidan har det utvikla seg. Først er konfirmantane med på påskegleda inne i kyrkja, før det er galskap og moro ute.
Var ishinne på vatnet
Ungdommane tykkjer det er artig, sjølv om det er kaldt.
– Det var faktisk ei ishinne her då vi kom i dag. Men dei gruar seg ikkje ikkje og det var stor stemning då vi skulle bade.
Hjelpekorpset i bygda hadde kvelden før vore ute med motorsdag for å skjere hol i isen som var omlag 20 centimeter tjukk. Soknepresten veit ikkje kor kaldt det var i vatnet i dag.
– Men andre år vihar målt har det vore 1-2 grader.
Får med seg gode minne
Han ser at det ligg ei ungdommeleg glede over badinga og at dei får med seg gode minner.
– Dette er noko kvart kull med nye konfirmantar ser fram til.
Stolte konfirmantar som våga seg uti det kalde Jølstravatnet.
Foto: Rune Molvik