Dei tre jentene har gått Jostedalsbreen på langs, men kom seg no ikkje ned frå fjellet. I forsøk på å kome seg ned til Øygard i Supphelledalen i Fjærland skal dei ha utløyst fleire skred, men ingen av dei vart tekne, opplyser politiet.
Dei tre gjekk då tilbake til Flatbrehytta, der dei søkte tilflukt.
Politiet seier ved 18-tida at dei vurderer situasjonen, men at det er vanskelege snøforhold og stor rasfare i ruta ned frå fjellet.
– Det er ingen akutt fare, men vi vurderer situasjonen fortløpande, seier operasjonsleiar Nils Erik Eggen ved Sogn og Fjordane politidistrikt.
Ein halvtime seinare hadde politiet bestemt seg for å hente ned jentene med helikopter.
Trur det kan gå fleire ras
Gaute Dvergsdal Bøyum, som også var på tur i området, seier til Firda.no at det har rasa mykje i området. Han står no vel 150 meter frå toppen.
– Det gjekk ras kvart femte minutt nesten, men no når sola forsvann har det gitt seg, seier han til NRK.no.
- LES OGSÅ:
Han seier sola har varma opp snøen i området og gjort den svært ustabil, og trur at skiløparar vil kunne løyse ut skred i området, også etter at sola har gått ned.
– Det er eit ganske tjukt lag med veldig mjuk snø her, seier han til NRK.
Han håpar at han skal klare å ta seg ned att i løpet av kvelden, og seier det vil ta vel halvanna time å ta seg ned frå fjellet.
Ein annan mann skal ha teke seg heilt opp til hytta, medan Dvergsdal Bøyum valde å ikkje gå vidare.
Henta ned med helikopter
Dei vanskelege forholda i fjellet gjorde til slutt at politiet bestemte seg for å hente dei ned med helikopter. Det er ikkje ønskjeleg at jentene skal prøve å ta seg gjennom rasområdet slik situasjonen er no.
– Luftambulansen frå Førde vil reise ut, og dersom alt går som planlagt, reknar vi med at situasjonen er løyst i løpet av ein time, seier Eggen hos politiet til NRK.no klokka 18.30.
Dei to mennene som var i området blir også henta ned med helikopter.
I Møre og Romsdal er ein person frakta til St. Olavs i Trondheim etter at han vart skadd i eit ras ved Store Vengjetind. Det har også gått fleire andre skred i nabofylket i nord.
- LES OGSÅ: