Mats Bjørnar Leirdal (Bjørn), Gjøran Tefre (Førde), Håvard Gutubø Bogetveit (Førde) og Johannes Thingnes Bø (Markane) knuste heimefavoritten Akershus under dagens NM-stafett i Holmenkollen.
At speakeren ikkje ein gong hadde høyrt om Gutubø Bogetveit krydra sigeren.
– Det gjorde at sigeren smakte ekstra godt. Dei vart bra lange i maska då vi gjekk inn til siger, ler Førde-guten.
– Betre enn førre helg
Gullmedaljen er den andre troppen frå Sogn og Fjordane vender heim med. Laurdag tok årets trippelverdsmeister i skiskyting, Thingnes Bø, sitt fjerde NM-gull på ei veke då han vann ti kilometeren.
For andre gong på ei veke såg Gutubø Bogetveit stryningen hale i land sigeren på ein stafett. Førre helg vart gull under junior-NM i skiskyting på Ullsheim.
– Sigeren i dag smakar faktisk hakket betre enn NM-gullet førre helg. No hadde vi to skiskyttarar på laget og speaker hadde ikkje ein gong høyrt om meg, humrar han.
Tok over showet
I alt 111 lag stilte på starstreken. Etter første Leirdal var Sogn og Fjordane på 24. plass, 13 sekundar bak tet. Tefre, som tidlegare i meisterskapen hadde to femteplassar, leverte ein kjempeetappe og tok laget opp i tet.
Så tok skiskyttarane over showet.
– Eg skaffa ei luke på fem-seks sekund til Johannes. Han vart teken att, men så rykka Johannes og kom i mål 30 sekund før Akershus, seier Gutubø Bogetveit og legg til at Thingnes Bø rykka frå ein tidlegare verdsmeister for juniorar i langrenn, Sindre Bjørestad Skar (Bærums Verk).
– Dei hadde ikkje sjanse
– Dei andre hadde ikkje sjanse. Vi hadde ein veldig god dag alle mann på laget, legg Gutubø Bogetveit til. Som for øvrig gjekk sine første langrennskonkurransar under NM i Holmenkollen.
No håpar han på ytterlegare suksess i senior-NM i skiskyting i Trondheim til helga.
Truleg stiller han på stafettlaget saman med Tarjei Bø, Ronny Hafsås og Johannes Thingnes Bø.