Invitasjonen har skapt harme blant dei som er tilhengjarar av ei meir tradisjonell markering.
- Det minnar meir om eit moteshow, seier Rita Tonning, som har arrangert kvinnedagsmarkeringar i Førde i mange år.
Sei di meining:
Kan vinne bli-ny-dag
Elegante damer med rosa klede, diamantsmykke og raud leppestift prydar brosjyren. På programmet står ein kvinneleg gründer, lokale moteklede og deltakarane kan vinna ein bli-ny-dag med spa, frisør, sminke og nytt antrekk.
Invitasjonen til jentetreffet er ikkje blitt like godt motteken hos alle.
- Eg ville brukt 8. mars-feiringa til litt andre ting enn å ha fokus på mote, seier Tonning.
På programmet står også verpresentatør på TV2, Eli Kari Gjengedal. I invitasjonen står ho omtalt som "verdame", forfattar, miljøforkjempar og sogning.
- Mykje gjenstår
Tonning meiner kvinnedagen bør brukast til å feire kvinnene for dei milepælane som er oppnådd opp gjennom åra.
- Kvinneorganisasjonane og fagrørsla har dei siste 100 åra jobba med ein god del viktige saker. Noko har vi fått til, men mykje gjenstår.
Tek ikkje kritikken tungt
Det er Sparebanken Sogn og Fjordane, Innovasjon Norge og Førde Internasjonale Folkemusikkfestival som står bak jentetreffet.
- Hovudtema er miljø og gründerskap, seier Lene Grande i banken.
Ho tek ikkje kritikken rundt motevisninga så tungt.
- Dette er eit tilbod til kundane våre. Dei vel sjølv om dei vil komme eller ikkje. Vi har ei lang påmeldingsliste allereie. Her i Førde må det vere rom for eit stort mangfald og mange ulike arrangement den dagen.