– Det at eg ikkje får lov å gje blod får meg jo til å føle meg litt mindre verdt som borgar, seier Stian Brønmo.
Daniel Mekki, leiar i landsforeningen for lesbiske, homofile, bifile og transpersonar (LLH) i Hordaland, vil ha endringar, og jobbar for at homofile skal få gje blod innan 2014.
Høgare risiko for HIV
Ifølgje Mekki er det ein stor sjanse for å få gjennomført endringa innan eitt år. Då skal alle som har moglegheit få gje blod, håpar han.
– Det burde ikkje ha noko å seie kven du har hatt sex med. Det er hyppigheita og risikoåtferda som burde avgjere om ein skal få gje blod, seier Mekki.
Einar Klæbø Kristoffersen er sjef i Blodbanken på Haukeland i Bergen. Han meiner det er urealistisk å håpe på at reglane blir endra.
Kristoffersen fortel at Blodbanken på ingen måte diskriminerer homofile på grunn av seksuell legning.
– Det er ikkje homofile som ikkje kan gje blod, det er berre menn som har sex med andre menn som blir permanent utelukka frå å gje blod.
Dette skuldast høgare risiko, mellom anna for smittefare for HIV, ifølgje Kristoffersen.
– Ingen rett å gje blod
Ingen HIV-test er hundre prosent sikker, og blodbanken vil ikkje ta nokon sjansar, seier Krestoffersen.
– Det er faktisk ingen rett å vera blodgjevar. Det er heller ingen plikt.
Brønmo seier han ikkje skjønar kvifor reglane ikkje blir endra.
– Det at ein på generelt grunnlag skal nekte nokon å gje blod fordi ein har sex med nokon av same kjønn, sjølv om det er ned same partnar i ti år, det syns eg er veldig merkeleg.
– Det er mange som treng blod. For meg er det viktig å hjelpa, seier fortel Brønmo.