– Me vil ha meir frukt frå Sogn. Reis heim og plant ut meir, for me manglar tonnevis med norske eple i butikkane kvar dag.
Det var beskjeden frå Roger Utengen i Bama, då han møtte fruktdyrkarane på Sognefrukt tysdag, ifølgje Sogn Avis.
Ifølgje Utengen har frukta særs god kvalitet, og det er historisk høge prisar.
- LES OGSÅ:
Marknaden har plass til meir
Sognefrukt har som mål å auke epledyrkinga med 50 prosent fram til 2018.
– Det er rom for endå meir, seier Knut Amund Surlien i Gartnerhallen til Sogn Avis.
Fruktdyrkarane frå Sogn fekk mykje skryt under møtet i går.
– Eg må få skryta over jobben på pakkeriet til Sognefrukt. Her er gjort ein kjempejobb for å få nye produsentar og nye areal. Det er eitt av dei betre lagera når det gjeld å få frukt med kjempekvalitet ut i butikkane, seier Utengen til avisa.
- LES OGSÅ:
Marknaden skrik etter meir frukt
Mange fruktdyrkarar i Sogn har satsa meir. Over tre år skal det plantast ut 25 mål med plommer, 50 mål med pærer og 75 mål med eple. Og det er godt nytt for Utengen.
– Me treng meir frukt fort. For ei veke sidan hadde me 23 pallar med norske eple. Me kunne glatt selt ti gonger meir, seier Utengen.