NRK Sogn og Fjordane og Sparebankstiftinga Sogn og Fjordane har også i år gått saman om å kåre den beste kulturidéen. Det kan vere både smått og stort.
Kultursjef Pål Fidjestøl i Sparebankstiftinga seier dei allereie har fått inn fleire gode idear, men at dei har lyst på fleire.
– Det er gøy å lese søknadene. Vi har fleire forskjellige festivalkonsept, og det er eit par andre ting også. Alt frå blomsteroppsatsar til nokon som vil selje soft-is, seier Fidjestøl.
- LES OGSÅ:
– Kvalitetsstempel
I fjor var det Utkantfestivalen på Skjerjehamn som stakk av med prisen på 100.000 kroner og heider og ære då dei vart kåra til " Årets kulturide" i Sogn og Fjordane.
Njål Hansen Wilberg som er styremedlem i Utkantfestivalen, seier det har heva produktet deira.
– Det har heva Utkantfestivalen eitt hakk til at vi fekk denne prisen.
– På det tidspunktet pengane kom var i ferd med å gire opp til sjølve festivalen, og då er vi alltid i beit for pengar. Pengane var med å sikre ei god gjennomføring, seier han.
Han trur også merksemda dei fekk på grunn av prisen var svært bra for dei.
– Vi fekk eit kvalitetsstempel som gjorde at folk vart meir stolte av å vere med på festivalen vår, seier Hansen Wilberg.
- LES OGSÅ:
- LES OGSÅ:
(Artikkelen held fram under biletet)
MEIR PENGAR: Folka bak Utkantfestivalen fekk i fjor 100.000 kroner ekstra i potten før dei skulle arrangere festivalen i Skjerjehamn.
Foto: Gøril SætreVil ha fram mangfaldet
Distriktsredaktør Rolf Sanne-Gundersen i NRK Sogn og Fjordane seier det er viktig å løfte fram dei gode ideane.
– Anten det er smått eller stort, smalt eller breitt så er det viktig å få det fram. I fjor fekk vi mange gode søkjarar, og vi håpar at endå fleire hiv seg frampå i år. Vi i media blir ofte skulda for å vere veldig kritiske, men her er ideen å løfte fram noko av det positive i det mangfaldige kulturlivet i Sogn og Fjordane.
- LES OGSÅ:
Fire linjer er nok
No er Fidjestøl spent på kor mange som nyttar tida fram til måndag på å sende inn sin ide.
– Vi er veldig spente før søknadsfristen som er måndag. Vi må berre krysse fingrar og tær og gle seg til å lese bunken med søknader, seier han.
Og du har tida på deg heilt fram til midnatt måndag.
– Om du berre har fire linjer, så send inn. Vil vi ha deg med vidare, så tek vi kontakt, seier Fidjestøl.
Søknadsfrist 15. april
Fristen for å sende inn søknad er 15. april. Send søknaden til kulturide@nrk.no og skriv «Årets kulturidé 2013» i emnefeltet.
Når søknadsfristen er ute, skal ein jury plukke ut eit finaleheat. Ein reporter frå NRK Sogn og Fjordane kjem så til å reise rundt og oppsøke finalistane, som blir presenterte i radiosendingane og på nettsida til NRK.
Folk flest kan vere med på å kåre vinnaren via nettet, i tillegg vil juryen ha eit ord med i laget når det skal avgjerast kven som vinn 100.000 kroner.
Det heile blir avslutta med ein fest i hagen til NRK Sogn og Fjordane til sommaren. Der skal vinnaren av «Årets kulturidé 2013» presenterast.