Bana vil bli om lag tre kilometer lang og vil frakte turistar opp i nærare 1700 meters høgde. Initiativtakar Inge Melkevoll trur gondolbana vil bli ein turistmagnet.
- Dette vil vere eit blinkskot når det gjeld reklamen for Noreg som feriemål.
Breen blir utilgjengeleg
Briksdalsbreen har i løpet av få år trekt seg fleire hundre meter attende, og vil for første gong ikkje vere mogeleg å nå for turistar. 280.000 vitja i fjor turistmagneten i indre Nordfjord, men med breen utilgjengeleg vil truleg besøkstalet går kraftig ned.
Stor tru på prosjektet
Og det er for å møte denne utfordringa bygdefolket no vil byggje ei gondolbane. Ei arbeidsgruppe, der mellom andre ordføraren i Stryn og Rickard Grov ved Alexandra hotell er med, har stor tru på prosjektet. 11. mai presenterte dei prosjektet for Miljøverndepartementet.
- Vi vende oss til Miljøverndepartementet for å undersøke sjansane for å starte planlegging av ei gondolbane opp på Jostedalsbreen.
Vil endre grensa
Men forkjemparane for gondolbane vil møte ei omfattande utfordring gjennom at den planlagde bana vil strekkje seg inn i nasjonalparkområdet. Melkevoll håper imidlertid at dette let seg ordne.
- Det vi kan tenkje oss i den vidare saksgangen er at vi kan bli samde om ei endring av grensa for nasjonalparken.
- Dette må aldri skje
Tidlegare leiar Erik Solheim i Norges Naturvernforbund stiller seg svært kritisk til planane.
- Dette må aldri skje. Nasjonalparken er oppretta nettopp for å hindre slike installasjonar og inngrep i området.