Tysdag kveld denne veka var ordførar Harald Rydland på hjortejakt.
– Eg gjekk ut på jakt etter at månen var komen opp, då var det fint vêr og godt lys, og då høyrde eg ein del hjortar som låg og brølte i skogen litt bort forbi der eg hadde lagt meg på lur, seier Rydland.
Har høyrd på hjorten i fleire år
Sunnhordland fortel i dag om ordføraren sin spesielle jakttaktikk; å etterlikna ein brunstig hjort.
– I oktober-november, når det er brunsttid, er ein av metodane hannhjortane bruker for å skaffa seg revir å brøla til kvarandre. Då skal dei testa kvarandre, og ofte endar det i slåsskampar, forklarer Rydland til NRK Hordaland.
Ordføraren bur nær skogen og har høyrd desse lydane i fleire år.
– Eg høyrde desse hjortane som brølte og tenkte eg skal prøva eg, og så byrja eg og å brøla, seier Harald Rydland.
HØYR:
– Er det vanleg å gjera slikt på hjortejakt?
– Det er ein kjent metode. Det er mange som har brukt det før, men det er ikkje alltid det verkar.
– Heldigvis få som høyrer på
– Føler du deg litt dum når du skal byrja med dette?
– Heldigvis er det ikkje så mykje folk som står og høyrer på, ler Rydland.
Etter å ha brølt høyrde Rydland ein hjort som var ca. ein kilometer unna han.
– Neste gong eg brølte kom han litt nærare, og så venta eg litt til og då såg eg han plutseleg 100 meter frå der eg sat. Då kom han i mot meg og skulle sjekka kva type dette var, seier Fitjar-ordføraren.
Den første av tre
Då hjorten var 100 meter unna sette Rydland i eit brøl til, og hjorten kom endå nærare.
– Ca. 30 meter i frå meg stoppa han, og så sette han breisida til, og då small det. Så sprang han ca. 70 meter med knust hjarta før han deiste i bakken.
Rydland har løyve til å ta tre hjortar. Hjorten tysdag kveld er den første av desse tre.
– Dei neste dyra eg har løyve på er ei kolle og ein kalv, og då fungerer det ikkje med denne metoden. Då får me legga oss på lur i skogen og sjå om me ser dei, eller luska oss inn på dei, seier Harald Rydland.
HØYR INTERVJUET: