Arbeidet med tunnelane på Strynefjellet fører til at fjellet er stengt heile dagen, med unnatak av tre kortare kolonner.
Arbeidarane i tunnelane har no sommarferie, men Statens vegvesen planlegg å starte opp att arbeidet 15. august.
Vil ha arbeidet utsett to veker
Cruise- og reiselivsnæringa i Nordfjord har sendt brev til Statens vegvesen der dei på det sterkaste ber Vegvesenet om å utsetje arbeidet i minst to veker, til 1. september.
Leiar i Reisemål Stryn og Nordfjord, Inger Elin Nes Hjelle, meiner tunnel arbeidet vil råke næringa midt i den mest hektiske turistsesongen.
– Vi tykkjer det er veldig uheldig å starte opp at med kolonne i midten av august. Det er framleis midt i den hektiske turistsesongen og mange kjem den vegen, seier Hjelle.
- LES OGSÅ:
- LES OGSÅ:
Skjer i den viktigaste månaden
August er ein av dei tre aller viktigaste månadene for reiselivsnæringa, og 20 prosent av alle gjestedøgn gjennom heile året kjem denne månaden.
– Det å stå og vente i fleire timar er ikkje bra for reiselivsnæringa i Nordfjord og vil skape eit dårleg første møte for mange reisande, seier Hjelle.
Ho er redd dette vil skape både og frustrasjon., og håpar det hadde late seg gjort å utsetje arbeidet til 1. september.
Fryktar for cruisetrafikken
August månad er også høgsesong for cruisenæringa, som har rekna ut at mellom 200 og 250 såkalla overlandsbussar mellom Hellesylt og Geiranger vil køyre gjennom dei tre Strynefjellstunnelane i siste halvdel av månaden.
Reiselivsnæringa påpeikar at desse bussane må nå Geiranger i rett tid for å ikkje forseinke cruiseskipa, og at det vil vere dramatisk dersom desse bussane må stå i timevis og vente.
- LES OGSÅ:
- LES OGSÅ:
Mange land har seinare ferie enn Norge
– Veldig mange europeiske land har ferie seinare enn Norge. Til dømes er august ein av dei viktigaste feriemånadene for til dømes Tyskland, som er den største utanlandsmarknaden for Nordfjord, seier Hjelle.
Statens vegvesen har kontakta entreprenøren Veidekke for å høyre kva økonomiske og tidsmessige konsekvensar ei utsetjing vil få.
Må kunne jobbe utan frost
Seksjonsleiar Margot Åsebø seier dei forstår argumenta til reiselivsnæringa.
– I denne saka mange omsyn å ta. Entreprenøren må få jobbe når det ikkje er frost i tunnelane. Difor må vi ha nokre tider på året der vi kan drive med det arbeidet som inneber spruting av betong, og då må vi ha plussgrader i tunnelane, seier Aasebø.
Hjelle håpar på ei avklaring så snart som råd.
– Det håpar vi kjem ganske snart. Fått beskjed om dei motteke brevet og saka opp til vurdering, seier Hjelle.
Aasebø seier det kjem an på kva Veidekke seier til saka.
– Vi har teke det vidare til entreprenør Veidekke for å finne ut kva følgjer det vil få for deira arbeid. Vi må prøve å få fakta på bordet så raskt som råd, seier Aasebø.