Fryktar is kan føre til ulukker

Dei siste to vekene har han lagt merke til vatn som dryp frå tunneltaket og ned i vegbana på tunnelen på fylkesveg 55 mellom Høyanger og Lånefjorden. Med bitande kalde minusgrader ute blir det også kaldt inne i tunnelen, og vatnet har frose til eit tjukt lag av is.

Måndag hadde Stølen fått nok, då stogga han like godt for å ta bilete av den tjukke isen.

- Om det kjem ein bil her med litt fart, og han får panikk fordi han ser det er noko is som kjem ut i vegen, og dermed byrjar svinge. Då kan det gå gale, seier han til NRK.no.

- Det var så mykje is at eg berre vart ståande å gape.

- Ein skikkeleg hump

Det er om lag 800 meter frå Lånefjorden-sida at dei som kjem frå Høyanger møter på den islagde vegkanten.

Stølen, som sjølv har erfaring med vatn- og frostsikring i tunnelar, er skremt over at isen har fått vakse seg så tjukk, og meiner Vegvesenet må ta grep.

- Isen blir høgare ut mot kvitestripa, men dei som kjem køyrande her vil oppleve ein skikkeleg hump, seier Stølen.

- Vatnet har også runne litt utover, så det er klink is i området, seier han.

(Artikkelen held fram under biletet)

Meiner plassen burde vore merka

Han meiner det er rart at dei som er ansvarlege for vedlikehaldet av vegen ikkje har gjort noko for å få vekk isen. Stølen reagerer også på at det ikkje er varsla om isen, verken med skilt eller med kjegler.

- Isen burde vore skrapa vekk, men eg forstår jo at det vil kome ny så lenge det er kaldt ute, seier Stølen til NRK.no.

- Eg er redd det kan skje ulukker her, det er nok mange som har hatt hjerte i halsen når dei køyrer her, seier han vidare.

Vedgår at dette ikkje er greitt

Seksjonsleiar i Statens vegvesen i Sogn, Eivind Yttri, har sett på bileta frå tunnelen måndag kveld. Etter at vegvesenet vart gjort merksame på den tjukke isen har dei varsla entrepenøren. Yttri sa ved 20-tida måndag kveld at dei allereie hadde sendt ut ei gravemaskin for å få vekk isen.

Yttri vedgår at det ikkje skal vere så mykje is langs vegkanten og ut i vegbana inne i ein tunnel.

- Det er ei utfordring å halde ein slikt problem i sjakk med den temperaturen vi har no, men då må vi kompensere det med skilting, seier han.

Vil setje opp skilt

Han seier at ein del av tunnelplatene akkurat her har vore skada, og at det er fordi desse er vekke at vatnet får drype ned i sjølve vegen.

- Vi er nøydde å gjere dei grepa vi kan midlertidig for å halde dette i sjakk, seier Yttri og seier dei vil få opp skilt og at dei blir nøydde å skrape vekk is med jamne mellomrom.

Kor tid ein vil få ordna med ei ny plate i tunneltaket kan han ikkje svare på no.