Fem personar i frontkollisjon på E39

To bilar har frontkollidert i ei 80-sone ved Juklestad, mellom Førde og Skei i Sunnfjord kommune.

Fem personar er sende til sjukehus etter ulukka. Skadeomfanget er førebels ukjend. Vegen var ein periode heilt stengd.

Naudetatane fekk melding om ulukka klokka 1047. Det sat to personar i eine bilen, og tre personar i den andre.

– Det er ei alvorleg ulukke. Status no er at fire personar er køyrde i ambulanse til sjukehus. Ein person er frakta med luftambulanse, opplyser innsatsleiar for politiet, Ole Jørgen Eide.

Alle pasientar fekk tilsyn av helsepersonell før dei vart sende til Førde sentralsjukehus.

– Ein av bilane står i grøfta, den andre i delvis i vegbana. Det er snakk om ei høgenergiulukke, Jostein Steinsland Hauge ved 110 Vest.

Det danna seg lange køar på staden.

Klokka 12.49 opplyser politiet at bilane er frakta bort frå staden og vegen er opna igjen.

Politiet kjenner ikkje årsaka til frontkollisjonen.

– Vi har dokumentert staden, snakkar med vitne og gjer tekniske undersøkingar, seier innsatsleiar Eide.