Over 6000 heimlause i Norge

6259 personar i Norge er utan fast bustad. Talet på heimlause er nærast uforandra dei siste fire åra.

– Det er faktisk betre enn vi frykta, seier forskingssjef ved Norsk institutt for by- og regionforsking, Evelyn Dyb.

Fleire born utan fast bustad

Tidlegare var den typiske heimlause ein mann i trettiåra med alvorlege rusproblem.

– Det vi no ser er at gruppa er meir samansett. Det er mellom anna fleire bustadlause familiar med mindreårige born enn før, fortel Dyb.

Samlivsbrot og familievald er mellom grunnane til auken av familiar utan fast heim. I ein betydeleg del av dei heimlause familiane er foreldra fødde utanfor Norge.

– I åra framover treng vi ein større innsats inn mot denne gruppa. Tradisjonelt har mykje av tiltaka vore retta mot rusavhengige og dei mest vanskelegstilte, og det har vore flott, men vi må forsikre oss om at bustadlause ikkje aukar i andre grupper, seier Dyb.

NIBR er også bekymra for at det vil kome ei auke i bustadlause mellom personar frå EØS-området dei komande åra.

Bustadmangel

Evelyn Dyb har vore med på å evaluere tiltaka som er sett inn får å få ned bustadlause. Mangel på bustadar er eit gjengangarproblem for kommunane.

– Spesielt i dei større bykommunane er dette eit problem. Om kommunane vil ha talet ned må dei fokusere på å byggje bustadar slik at ein har noko å tilby dei som ikkje sjølv klarer å finne noko på bustadmarknaden, seier Dyb.

I 2006 la den raudgrøne regjeringa fram ein strategi for å drastisk redusere talet på personar utan bustad. Rapportane frå NIBR viser at talet på heimlause var på veg opp i denne perioden og det dei siste åra stabilisert seg i staden for å gå ned.

– Det var ein veldig ambisiøs strategi. På visse området har den fungert, men det er sjølvsagt ikkje godt nok når måla ikkje er nådd. På same tid vil eg karakterisere nokre av måla som urealistiske, seier Dyb.

400 nye bustadar i Bergen

Bergen er ein av kommunane som har hatt problem med å huse alle innbyggjarane sine.

Dei siste sju åra har talet på registrerte heimlause blitt redusert frå 770 til 616 personar, men framleis har vestlandsbyen den største delen av heimlause i forhold til folketal av storbyane i Norge.

– Det er ikkje alle tala i rapporten som er like hyggelege, men det er godt å sjå at vi er på rett veg, seier sosialbyråd i Bergen, Dag Inge Ulstein.

Bustadar har også her vore den store utfordringa for å få ned talet. Dei siste åra er 150 nye bustadar på plass, og endå 250 er på veg i løpet av dei komande.

– Her må vi berre jobbe på. Vi ønskjer ikkje at nokon skal vere heimlause. Det er viktig for oss å halde trykket på bustadbygginga oppe, seier Ulstein.