Hovudutval for plan og næring i fylkeskommunen vedtok i dag å løfte fram fem søknader til årets bulystordning.
– Vi har fått mange gode søknader i år, og vi veit av erfaring at bulystprosjekta våre gjev resultat. Difor håpar vi at departementet støttar flest mogeleg i årets bulystløyving, seier hovudutvalsleiar Hilmar Høl (Ap) i ei pressemelding frå fylkeskommunen.
I Sogn og Fjordane vart det søkt om støtte til 13 søknader. Hovudutvalet har vedteke at desse fem prosjekta skal gå vidare til departementet.
- Europeisk arbeidsinnvandring, Stongfjorden Vekst
- Velkomen til Vik, Vik kommune
- Undring i kvardagen, Naustdal kommune
- Bulyst ved nasjonalparken, Jostedalsbreen nasjonalparksenter, Stryn
- Bergteken, Aurland kommune
Tidlegare har Sogn og Fjordane fått statleg støtte til i alt 12 ulike bulystprosjekt, mellom anna fekk Bratt Moro i Sogndal støtte i 2011.
Kommunal- og regionaldepartementet har i 2013 lyst ut 35 millionar kroner til satsing på bulyst.
Departementet har i år avgrensa tema til innvandrarar, ungdom og tilflytting, samt andre tema, som er godt distriktspolitisk grunngjevne og har ei god lokal og regional forankring. Bulystordninga er i 2013 lyst ut for fjerde og siste år.