Gudvangatunnelen får kring 350 av dei 380 millionane som er løyvd til tunnelopprusting i fylket.
Arnstein Menes meiner pengane også må kome andre tunnelar til gode.
- LES OGSÅ:
– Eg meiner vi har større utfordringar. Vi har fleire tunnelar som treng sårt utbetring. Ulukka i sommar viser ei kjempeutfordring med tunnelar, samt omkøyringsvegar som ikkje har den kapasitet som vi ynskjer for å takle stenging av tunnelane våre, seier han og siktar til brannen i Gudvangatunnelen.
Mest til Gudvangatunnelen
I dag vart det kjent at Statens vegvesen Region vest kan få opp til 850 millionar kroner meir til oppgradering av tunnelane på vegnettet dei neste fire. Kring halvparten går til Sogn og Fjordane.
Med unntak av 30 millionar går alt til utbetring av Gudvangatunnelen på E16.
– Vi fekk gjort ein del utbetringar i Gudvangatunnelen etter brannen 5. august, men i det vidare arbeidet skal det blant anna installerast nytt ventilasjonsanlegg og lysanlegg. Det skal også sprengjast ut for tekniske rom, tunnelen skal reinskast og sikrast. Tunnelportalen ved Langhuso skal utvidast, og det skal gravast grøfter for kablar, leidningar og drensanlegg, seier avdelingsdirektør Nils Magne Slinde.
Treng meir midlar
Menes er glad for å sjå at utbetring av E39-strekkjene Vadheim – Sande og Bjørset – Skei, samt vidareføring av opprustingsarbeidet på E16.
(Artikkelen held fram under tabellen)
Sjølv om han er glad for at det kjem meir midlar til tunnel enn det som var varsla gjennom Nasjonal Transportplan, meiner senterpartipolitikaren at det må komme meir.
– Vi avheng av å halde vegnettet ope med tunnelane. Dersom tunnelane blir vurdert som ikkje sikre, så må dei gjerast noko med. Då ligg det for lite midlar inne både på riksveg og fylkesvegar, seier Menes.
– Kø og kaos
– Fylkeskommunen er per i dag ikkje i stand til å ruste opp alle tunnelane har på vegane og avhengig av at staten kjem og hjelper oss, legg han til.
Utvalsleiaren peikar mellom anna på erfaringane frå då Gudvangatunnelen måtte stengjast og trafikken gjekk om riksveg 13 Vikafjellet og fylkesveg 55.
– Der vart det kø og kaos, seier han og siktar spesielt til strekkja Hella – Leikanger.
Ikkje overoptimist
– Det er rett fokus å peike på tunnelvedlikehaldet, men eg trur det må meir midlar. Eg er spent på om den nye regjeringa klarer å gripe fatt i dette og kan bidra med meir midlar til tunnelvedlikehaldet, men eg er ikkje overoptimistisk på at dei skal sjå alle utfordringane vi har spesielt på Vestlandet, legg han til.
– Men no har kanskje ikkje den føregåande regjeringa gjort nok heller?
– Nei, dette er eit område det er gjort for lite på, det skal eg gjerne innrømme. Så får eg håpe at det fokuset som er no, både frå vegvesenet og diverre gjennom det som skjedde i sommar, fører til at vi får gjort meir på tunnelvedlikehaldet.
Må prioritere E16 og E39
Avdelingsdirektør Slinde er samd i at det er stort behov for å ruste opp mange tunnelar på vegnettet i fylket. Han nemnder lysanlegg, ventilasjon og naudnett.
Samstundes hastar det mest med å ruste opp tunnelane på det transeuropeiske nettverket, E16 og E39. Dei må vere utbetra til 2019.
Slinde legg til at løyvinga lettar presset på drift- og vedlikehaldsbudsjettet.
– Gudvangatunnelen er den lengste og mest krevjande å få gjort noko med. Eg reknar med det kjem meir pengar på investeringsbudsjettet, og eg er også trygg på at det kjem ein del midlar til drift- og vedlikehaldsbudsjettet som må prioriterast i andre tunnelar både i vårt fylke og andre delar både på e16 og 39, seier han.