– Eg kan stadfeste at eg og kona har gitt ein kvart million kvar. Utover det har eg ingen kommentar, seier Johannes Henjum til NRK.
Det har i lengre tid vorte samla inn pengar til ei MR-maskin ved Lærdal sjukehus, og denne veka var det klart at innsamlinga har gitt sju millionar kroner på konto.
Dermed manglar dei tre millionar for å ha finansieringa på plass. Med bidraget frå ekteparet Henjum er målet eit godt steg nærare.
– Vi høyrde at dei hadde bruk for pengane, og då bestemde vi oss for å gi, seier Henjum.
- Les også:
Han ønskjer ikkje å kommentere om det er ein konkret grunn til den sjenerøse gåva frå paret, men understrekar at dei lever nøkternt og er i ein posisjon der dei har høve til slikt.
– Dette er vel brukte pengar. Vi håpar dette kjem mange til nytte. Det er det viktigaste, seier Johannes Henjum.
Ordførar i Lærdal, Jan Geir Solheim, har sjølv ringd ekteparet og takka dei for gåva til MR-maskina.