Ein personbil vart i ettermiddag treft av eit hjul frå ein lastebil på riksveg 5 i Kjøsnesfjorden i Jølster.
Både førar og passasjer i Volvoen slapp med skrekken.
Dramatiske sekund
Men det vart nokre dramatiske sekund då vogntoget som kom imot mista to av hjula. Det eine traff fronten på personbilen.
NRK-reporter Arve Uglum køyrde rett bak personbilen og var vitne til dramatikken. Han måtte sjølv svinge unna det eine hjulet som kom trillande.
– Vi fekk oss ei overrasking
Uglum køyrde rett bak Volvoen, og var på veg frå Førde til Sogndal då hjula losna.
– Vi var på veg ut av ein tunnel og vogntoget kom rundt ein sving. Plutseleg kom det noko rullande imot oss. Kva i all verden er dette, tenkte eg. Så såg eg at det taff bilen framfor me, seier Uglum.
Det eine hjulet rulla utfor vegen, men det andre traff Volvoen i sida før det kom mot bilen til Uglum. Då hadde det mista farta, men han måtte likevel svinge unna.
– Vi fekk oss ei overrasking. Han som køyrde framfor meg såg veldig rysta ut då han komme ut av bilen. Han hadde ikkje sjans til å komme seg unna, seier Uglum.