Bygd var innesperra av jordras

Vegtrafikksentralen fekk melding om raset klokka 04.12 natt til måndag.

– Det var ein bilist som kom til staden som melde frå, seier vakthavande Idar Sangolt ved Vegtrafikksentralen i Bergen til NRK.no i 05.15-tida.

SISTE: Klokka 08.25 opplyser Vegtrafikksentralen at vegen er rydda og opna.

Blir rydda når det lysnar

Jord og gjørmemassane som har kome ned i vegen skal mellom anna ha drege med seg eit tre, og heile vegen er sperra. Raset skal ha gått i området ved Urabukti, mellom krysset til riksveg 5 og Mundal.

– Det vil seie at dei som bur innanfor er innesperra, seier Sangolt.

Entreprenøren er på staden for å halde vakt, men det vil ikkje bli sett i gang med ryddearbeid før det lysnar får NRK opplyst i 05.30-tida.

Etter det NRK får opplyst har raset gått i eit område der det ikkje brukar kome ned noko. Jordmassane skal ha losna vel 15 til 20 meter over vegen.

– Dei vil sjekke litt i området over raset. Raset er ikkje så veldig stort, men heile vegen er stengd, seier vaktoperatøren.

Forseinka på jobb

Laura Kvamme bur i Fjærland, og er ein av dei som ikkje kjem seg på jobb til rett til måndag morgon.

– No snakka eg nettopp med brøytemannskapet, og dei trur det skal gå ganske greitt å få rydda raset. Men det forseinkar ein del folk, men det er ikkje meir dramatikk enn det, seier ho til NRK.no litt før klokka 08.

Det er haustferie i Sogn og Fjordane denne veka, og barna i bygda skal difor ikkje på skulen og blir dermed ikkje hindra av raset.

– Slik set var det flaks at raset gjekk i dag, seier Kvamme.

Ho kan ikkje hugse at det har gått ras i dette området før, men skildrar det som eit bratt område. Når vegen opnar att ser ho ingen problem med å ta seg forbi.

– Eg stolar fullt og heilt på at når dei opnar vegen så er det trygt å køyre der.

Ras sperrar fylkesveg 57

Også på fylkesveg 57 mellom Dale og Osen bru har det gått ras i morgontimane. Vegtrafikksentralen fekk melding like før klokka 06. Raset skal vere vel to meter høgt, men ikkje særleg breitt.

– Eg fekk nyleg melding om eit jordras ved Setenes. Entreprenøren er på veg ut for å sjå på kor stort det er, men ifølgje dei som er på plassen skal det ikkje vere så veldig stort, seier vakthavande Roger Nedberge Hille ved Vegtrafikksentralen i Lærdal til NRK.no klokka 05.50.

Også her er det venta at vegen vil opne att rundt klokka 08.30.

• LES OGSÅ: Vaska ned jordmassar frå fjellsida

Etter ein lang periode med tørt vêr, har det kome ned til dels store mengder nedbør i Sogn og Fjordane dei siste dagane.

Meteorologisk institutt har sendt ut OBS-varsel for Sogn og Fjordane, og melder om lokalt store nedbørsmengder måndag.