Søndag kveld brann det i ein trafostasjon på Danmarksplass i Bergen.
Brannvesenet måtte venta med å starta sløkkinga før el-montørar kopla ut straumen, men om lag klokka 22 meldte dei at brannen var sløkt.
– Me starta sløkkinga med vasskanon frå ein brannbil med litt avstand. Så held me fram med røykdykkarar tett på etter kvart, seier Jostein Steinsland-Hauge, vaktkommandør hjå 110-sentralen i Vest.
21.57 vart brannen meldt sløkt, men at det framleis var litt varme på staden. 40 minutt seinare reiste siste brannbil derifrå.
Politiet sperra vegen for trafikk frå krysset Inndalsveien – Bjørnsons gate i retning sentrum då sløkkearbeidet heldt på.
Anders Thorsen såg det meste då brannen utvikla seg, og var ein av dei som ringde brannvesenet.
– Det utvikla seg veldig raskt. Det var ikkje mange minuttane frå det berre var røyk til det var store flammar. Det var nesten som ein eksplosjon, seier han.