- Eg sa det til dottera mi at dette er jo snart 40 år sidan, kvifor skal ein hugse det no? Ho berre svarte at Edvard Munch trengte lang tid på å modnast han og, seier Berit Johansen Vetti etter at prisen er utdelt.
- Dette var heilt overveldande. Og det å møte det gamle klatrelaget mitt på Krossbu der me møttest første gongen var fantastisk, seier ho.
Pionér
Klatringa hennar, spesielt i is, står framleis att som noko av det ypperste pionoerarbeidet som er gjort innan dette feltet her til lands.
- Dette var ei uvanleg og krevjande form for isklagring. Det ypparste som vart gjort i Norge og Skandinavia på denne tida, seier juryformann og mangeårig rektor ved Norges Høgfjellskole, Nils Faarlund om breklatringa vinnaren gjorde på 60- og 70-talet.
Bur i Årdal
Berit Johansen Vetti bur i dag Utladalen i Årdal. Klatringa la ho på hylla då ho gifta seg med Jørgen Vetti som dreiv Vetti gard tett inne ved Vettisfossen i 1977.
- Då vart eg teken i fjøsskule, og så kom ungane. Då vart det ikkje meir klatring, seier ho.
At ho skulle bli trekt fram som ein klatrepioner i 2012, var ikkje noko ho var i nærleiken av å tenke over den gongen det stod på.
- Neida, det var berre å "sæla på" sekken og gå i veg. Eg tenkte aldri på å vere noko føregangskvinne. Vi gjorde det berre for venskapen og moroa sin del, seier ho.
(Artikkelen held fram under biletet)
Fjerde som får prisen
Ho er den fjerde som turiststasjonen på Krossbu vel å gje denne prisen til, og mykje av grunnlaget for prisen la ho då ho var breinstruktør nettopp på Krossbu på 60-talet.
Rundt denne tida klatra ho samtlege av dei 20 brattaste brearmane til Jostedalsbreen, og i 1975 klatra ho dei to siste av dei 269 2000-meterstoppane i Norge.
Ho nådde toppen på den siste saman med Kjetil Storrø 5. juli 1975.
- Meir enn fjellvettreglar
Torill og Kåre Våle på Krossbu forklarar grunnlaget for prisen slik:
"Fjelltryggleik er meir enn fjellvettreglar. For oss som driv turisme i fjellet er det viktig at folk lærer seg forståinga for utfordringane i fjellet på snø og is, sommar og vinter. Vi vil heidra nokre av dei som på frivillig basis har gått i spissen for dette".
Pokalen, som er det synlege beviset på prisen, vart delt ut på Krossbu laurdag ettermiddag.