NRK-journalist Gro Ravnestad var på reportasjetur til Naustdal då bilen ho køyrde vart treft av ei stor isblokk.
– Eg kom køyrande ut av den siste tunnelen mot Erdalen då ei stor isblokk losna frå fjellsida, seier Ravnestad.
– Vart litt skjelven
Ho prøvde å svinge unna, men isblokka traff bilen.
– Hadde eg kome eit sekund tidlegare, hadde det gått mykje verre. Det hadde ikkje vore noko kjekt, seier Ravnestad.
– Det var litt skummelt. Eg merka eg vart litt skjelven då eg stoppa bilen, seier ho.
Stor stein hamna på gangveg
Også i Vågsøy har det rasa utover vegen. Ein stor stein på nesten 300 kilo ramla ned frå fjellsida og hamna på ein gang- og sykkelsti langst riksveg 617 mellom Måløy og Raudeberg.
(ARTIKKELEN HELD FRAM UNDER BILETET)
Steinen dundra over begge køyrebanene på riksvegen og hamna nord for Skåratunnelen.
Det har gått fleire små steinras på strekninga som har hamna i og utanfor køyrebana. Bilistar har meldt ifrå om mykje vatn på den same strekninga.
Det har også gått ras på riksveg 5 ved Grov i Flora kommune. Stein- og isblokker hamna i vegbana, opplyser politiet.
– Køyr med fornuft
Vegmeldingssentralen har ikkje fått melding om dei store is- og steinrasa i fylket i dag, men dei ber bilistane om å vere på vakt.
– Ein bør køyre med fornuft og vurdere om ein faktisk må ut på vegane,. Folk må vere på vakt, for det kan kome ras når som helst, seier Arne Starheim i Statens vegvesen.