308 heilt permitterte arbeidstakarar fordelt på 128 i fiskeindustrien og 180 hovudsakleg i annan industri fører til at arbeidsløysa aukar også i juli samanlikna med juli i fjor.
Auken er på 16 prosent og Sogn og Fjordane skil seg såleis frå utviklinga på landsnivå der auken har stogga opp.
–Hovudårsaka til dette er at utfordringane til den konkurranseutsette industrien, som Sogn og Fjordane har mykje av enno ikkje er over, fortel direktør i NAV Tore Thorsnes.
1 363 utan arbeid
1 363 personar er no heilt utan arbeid. Dette utgjer 2,4 prosent av arbeidstyrken. Talet er framleis lågt samanlikna med resten av landet. Det er berre Oppland og Rogaland, begge med 2.2 prosent, som har lågare arbeidsløyse enn Sogn og Fjordane.
Arbeidsløysa i Norge er no på 3,0 prosent.
Negativt for industrien
Talet på langtidsledige aukar framleis og utgjer no 267 personar noko som er 91 personar fleire enn på same tid i fjor.
Arbeidsløyseutviklinga er svært ulik i kommunane i fylket. Om lag halvparten har nedgang eller stabilitet i motsetnad til kommunar med mange sysselsette innan industriell produksjon som framleis har til dels svært negativ utvikling siste året.
Dette gjev særleg negative utslag i Flora (+81%), Årdal (+100%) og Stryn (+66%).