Vedrana Rajic er andre vararepresentant for SV i kommunestyret i Sogndal.
Ho meiner dei politiske partia kunne gjort ein mykje større innsats for å få fleire innvandrarar med i politikken.
Den einaste kommunestyrerepresentanten med fast plass med innvandrarbakgrunn i Sogn og Fjordane er Srilogarajah Pasupathy i Eid.
- LES OGSÅ:
- Fleire kan medverke
- Eg kjenner ikkje til så mange tiltak som er gjort til no, seier Rajic.
- Er det skuffande?
- Ja, det er det. Når ein snakkar om likestilling, så bør det vere på alle nivå. Eg er ganske sikker på at mange kan medverke til eit politisk mangfald.
- Er utruleg gjevande
30 år gamle Vedrana Rajic har ein bakgrunn som skil ho frå dei andre lokalpolitikarane i Sogndal: Ho vaks opp i Bosnia, og 13 år gammal flykta ho frå krigen saman med foreldre og ei søster.
Men fast plass i kommunestyresalen i Sogndal har ho ikkje. Ho er andre vara for SV, og er så vidt i gang med noko som kan bli ei politisk karriere i lokalpolitikken.
- Å vere med på ein del av det politiske livet, og vere med å bestemme, er utruleg gjevande, seier ho.
- Må gjere ein større innsats
Men det er få innvandrarar med politiske ambisjonar i Sogn og Fjordane. I kommunestyret i Eid sit éin representant med innvandrarbakgrunn, Vågsøy har to på varaplass og Sogndal har berre bosniske Rajic.
Ho meiner dei politiske partia må gjere ein mykje større innsats overfor innvandrarar.
- Både det at eg er kvinne og at eg har innvandrarbakgrunn, gjer meg til ein minoritet. Sånn sett kan eg vere eit eksempel for andre, seier Rajic.