Formannskapet i Vågsøy vil innføre eigedomskatt og legge ned to skular i kommunen. Vågsøy kommune har eit driftsunderskot på 15 millionar kroner og har tapt ytterlegare 13 millionar på Tall Ships Races. Men styreleiar Rolf Domstein i Måløy Vekst meiner at eigedomskatt ikkje er vegen å gå.
- Det er vi negative til, det har vi gitt beskjed om til formannskapet. Det vil vere negativt for å få bedrifter til å investere og etablere seg her.
- Legg heller ned skular
Domstein fryktar for følgjene for næringslivet i tøffe økonomiske tider. Derfor ynskjer han heller at politikarane legg ned skular for å berge kommuneøkonomien.
- Eg trur det er eit potensiale for å strukturere, både på skulesektoren og på andre områder. Kommunen bør fyrst gå gjennom dette før dei sender rekninga til næringslivet og befolkninga.
- Men kan ikkje eit redusert offentleg tilbod også gå ut over vekst og utvikling?
- Joda, på enkelte områder er vi avhengige av god kvalitet på tenestene, men omstrukturering treng ikkje gå ut over kvaliteten.
Det kommunale vekstselskapet jobbar med å snu ein langvarig negativ trend med færre innbyggjarar i kommunen. Domstein meiner at alle steinar må snuast for å unngå eigedomskatten.
- Vurder kommunesamanslåingar
Vedtaket i formannskapet skal opp i kommunestyret rett før nyttår. På lang sikt meiner Domstein at kommunesamanslåing bør vurderast for å få ned utgiftene.
- På lang sikt er det eit betydeleg potensiale for å redusere driftskostnadane til kommunane ved å slå dei saman til større einingar.