- Eg er så skuffa og eg skjønnar ikkje logikken, seier Ole Anton Brekke som er leiar i Foreininga for Intensiv Stimulering av Hjerneskadde.
Mistar pleiepengar til opptrening
50 norske familiar står i fare for å miste offentleg støtte til opptrening av hjerneskadde born. Mange av borna viser store framsteg takka vere intensiv trening, og dette får mange til ved at ein av foreldra er heimeverande.
Ein av dei er familien Aabrekk på Sandane. Dei opplever situasjonen som fortvilande.
- Her står vi med eit stort arbeid i fanget kvar einaste dag. Eg meiner det er gale at vi skal bruke så mykje krefter og energi mot hjelpesystemet.
- LES OG:
For no mister familiane pleiepengane, fordi NAV meiner dei ikkje har krav på dei i utgangspunktet. Pengane er meint til kortvarig sjukdom, ikkje livslang trening.
- Ordninga med pleiepengar skal brukast berre når det er midlertidige sjukdomar. Det er ein feil at foreldra til desse borna har fått pleiepengar når borna sin sjukdom er varig, det seier statssekretær Jan Erik Størstad i Arbeidsdepartementet.
- Ulogisk grunngjeving
Brekke har sjølv ein son med CP og var den som fekk i stand ordninga med at familiar med hjerneskadde born fekk pleiepengar. Han meiner grunngjevinga til Størstad ikkje er logisk.
- Takka vere den omsorga foreldra kan gje ungane ved hjelp av støtta i form av pleiepengar får dei ein heilt annan livskvalitet, seier Brekke.
- Alle tapar på dette
Han meiner det er mykje å tape på å fjerne støtta, både for borna, foreldra og staten.
- Viss ein ser på kva AS Norge tener på at familiane trenar opp borna sine sjølv, så vert det vanskeleg å argumentere for at ein kan stoppe ei slik ordning, seier Brekke.
- Alternativet for desse borna er ein institusjonsplass som kostar mellom 2 og 2 og ein halv millionar kroner. Dette vil vere i staden for at familiane totalt sett får overføringar på rundt ein million kroner, forklarar Brekke.