Den tidlegare FSK-spelaren og trenaren har mange 16. mai-oppgjer mot Førde blant sine 429 kampar for bruntrøyene.
- Dette er det største dei lokale spelarane på Førde og Florø får oppleve i løpet av sesongen. Eg vil påstå at det betyr meir for Førde å slå Florø, enn å slå Aalesund i cupen, seier Solheim-Olsen.
Reprise for FSK
Den tidlegare storscoraren til FSK tek 16. mai turen til Florø stadion for å sjå gamleklubben sin ta i mot erkerivalen frå Førde. Han trur FSK gjentek suksessen frå i fjor - og tuktar Knut Erik Folland sine spelarar.
LES OGSÅ:
- Eg er rimeleg sikker på at FSK vil sleppe inn mål, så eg tippar 3-2 til FSK, seier han.
Trur på Førde
Førde tronar øvst på tabellen med full pott etter fire kampar. FSK har så langt i år overraska med berre tap for Årdal. Bruntrøyene er nummer tre med sju poeng.
- Ser du på resultata, så er eg ikkje det minste i tvil om at Førde er det beste laget i divisjonen. Verken Årdal eller Stryn ser ut til å vere av liknande kaliber. Det blir nok Førde sin sesong i år. Men dei er ikkje så suverene at det ikkje går an å slå dei i einskildkampar, seier han og vonar at 16. mai-oppgjeret blir av ein slik sort.
- Vekkjer sterke kjensler
- Slike betyr like mykje over heile verda. Dei vekkjer sterke kjensler hjå spelarar og publikumarar. Og så er det råma rundt. Kampen i morgon vil trekkje like mange tilskodarar som resten av vårsesongen til saman, seier han.
- Det er den største kjensleladde kampen, legg han til.
Boren på gullstol
Det er duka for fleire klassiske lokaloppgjer i 3. divisjon fredag 16. mai. Men få er av same kaliber som oppgjeret mellom sunnfjordlaga Florø og Førde. Kampen er av mange skildra som "hatoppgjer". Solheim-Olsen har spelt mange slike oppgjer.
- Beste minnet må vere frå 1992 då vi slo Førde 3-0 i Florø. Eg scora alle tre måla. Det var ei spesiell kjensle å bli boren av bana på gullstol av 150 personar, seier han.
Tekst-TV på i to dagar
Like friskt i minnet er også eittmålssigeren over Førde - i Førde.
- Begge lag var i 2. divisjon og vi vann 2-1. Då leia vi tabellen, medan Førde var sist. Etter kampen vart det litt feiring med tabellen på tekst-TV på. Heime hjå meg var tabellen på i to dagar, ler Solheim-Olsen.
Tre heimefavorittar
Tippeselskapet Betsafe trur Førde vil trekkje det lengste strået i 16. mai-oppgjeret. Dei tru også på heimesiger mellom Selje og Høyang, medan Stryn er soleklare favorittar i oppgjeret mot naboen Eid.
På Måløy stadion er det duka for nytt nabooppgjer når Tornado Måløy tek i mot Skavøypoll. Også her trur Betsafe på heimesiger.
Kampane kan du følgje direkte på NRK Sogn og Fjordane sine heimesider.