På grunn av flaumen har vasstanden i Hjellevannet stige til meir enn 6,15 moh.
– Det er om lag ein meter over normal vasstand på 5,0 - 5,2 moh. Vatnet har steget meir enn 30 cm sidan onsdag, seier Gunnar Mosevoll, einingsleiar for vassforsyning og avløp i Skien kommune.
Det er fare for at vasstanden vil auke ytterlegare dei næraste dagane.
Vasstanden i Meierelva og i Norsjø har også stige.
Må sikre ting i kjellar
Bustader på Bakken med lågtliggjande kjellarar kan derfor få vatn inn i kjellarane.
Skien kommune ber eigarar av slike bustader om å følgje med å forholda i kjellaren, og fjerne eller sikre gjenstandar som kan bli skada av vatnet.
– Dette gjeld også lågtliggjande bustader på Tangen på Skotfoss og Nedre Bæra ved Grøtsund, seier Mosevoll.
På grunn av vatnet stig i Norsjø kan også noen bustader langs nedre del av Løveidvegen vere utsett.
Her er ein oversikt over mest utsette områda:
Bakken:
- Strandgata
- Området rundet krysset mellom Søndre Falkumveg, Oscars gate og Blekebakkvegen
Skotfoss og Grøtsund:
- Nedre Bæra
- Tangen
- Nedre del av Løveidvegen.
(Artikkelen held fram under biletet)
Vasstanden vil gå ned i helga
NVE melder at vassføringa i Skiensvassdraget nå er over nivået for normal vårflaum. Vasstanden har auka det siste døgn i Norsjø og Heddalsvatn.
I Tinnsjøen er vasstanden torsdag morgon omkring 191,6 moh., det er omkring 10 cm lågare enn i går og ca. 30 cm lågare enn ved kulminasjon tidlegare i veka (ca. 191,9 moh.).
I Heddalsvatn er vasstanden torsdag morgon ca. 17,85 moh, her er det venta at vasstanden vil kulminere i løpet av torsdag 23. mai, med i underkant av 18 moh.
I Norsjø er vasstanden torsdag morgon ca. 16,4 moh, her ventast vasstanden å kulminere i løpet av fredag med ca. 16,5 moh.
Tusen kubikk i sekundet
I andre innsjøar i vassdraget har vasstanden vore stabil eller den har gått noe ned siste døgn.
Det er ikkje venta ny stigning i vasstanden av betydning i desse innsjøane dei neste dagane.
Vassføringa i Skienselva ut av Norsjø er torsdag morgon ca. 1000 kubikkmeter i sekundet.
Dette er det same som onsdag, vassføringa vil sannsynlegvis halde seg på dette nivået også fredag, og vil deretter gradvis bli mindre.