Leiar i Telemark Arbeiderparti, Terje Lien Aasland, meiner det er alt for mange usikre moment i den prosessen som er sett i gang rundt Sjukehuset Telemark.
Han meiner det er viktig å behalde det gode desentraliserte tilbodet som gir tryggleik til befolkninga.
– Vi ønskjer å oppretthalde det gode desentraliserte tilbodet vi har i Telemark for å trygge folks situasjon i kvardagen, seier Lien Aasland.
Alt for mykje er usikkert
Leiar i Telemark Arbeiderparti, Terje Lien Aasland
Foto: Kristin Rivrud / NRKHan meiner det er rett å oppretthalde lokalsjukehusa nå, fordi det er så mange usikre moment som må avklarast lenge før det er mogleg å ta ei anna haldning eller ein konklusjon i sjukehussaka.
Representantskapet i Telemark Arbeiderparti vedtok laurdag å be helseministeren Bent Høie ta ansvar for å avklare helse og sjukehustilbodet for folk i Noreg og Telemark.
– Sjukehusa har viktige funksjonar for folk i Telemark, seier Lien Aasland.
Han meiner det er viktig å avklare om Telemark kan få pengar til heilt nødvendige investeringar til sjukehuset i Skien.
– Det er viktig for å avklare om det er mogleg å ha ein stort sjukehus med fullverdig akuttfunksjon, seier Lien Aasland.
Må ha aktuttfunksjonar
Han viser til at regjeringa i regjeringserklæring har sagt at lokalsjukehusa er viktige for beredskapen og tryggleiken til folk.
– Då er det heilt nødvendig at vi har den sjukehusstrukturen vi har i fylket, seier Lien Aasland.
Han meiner det er viktig å få avklart korleis den nasjonale helse og sjukehusplanen blir sjåande ut, før det blir trekt nokon konklusjonar om lokalsjukehusa.
Lien Asland seier han er einig med regjeringa i at lokalsjukehusa skal ha ein sentral plass når det gjeld beredskap.
– Med utgangspunkt i det regjeringa sjølv seier kan eg ikkje sjå anna utgang enn at lokalsjukehusa må bestå med ein eller annan form for akuttfunksjon inntakt, seier Lien Aasland.
