Alle dei seks soldatane tilhøyrde den italienske kontingenten i den NATO-leidde ISAF-styrken.
Den islamistiske opprørsgruppa Taliban var raskt ute med å ta på seg ansvaret for sjølvmordsaksjonen.
55 menneske vart såra i angrepet, som skjedde like ved vegen til flyplassen i Kabul, rundt 1,5 kilometer frå den amerikanske ambassaden.
Sprengstoff i bil
Ein mann køyrde ein bil fullasta med sprengstoff inn i eitt av køyretya i NATO-kolonna, og eksplosjonen var enorm, fortel augevitne. Fleire av bilane til ISAF-styrken vart totalt øydelagde, medan andre igjen ekk store skadar.
Fleire bygningar vart også øydelagde i den kraftige eksplosjonen.
Ein talsmann for det afghanske innanriksdepartementet, Zemarai Bashary, opplyser at 21 butikkar vart øydelagde i eksplosjonen, medan sju køyrety vart øydelagde.
NATO-soldatar
Det italienske forsvarsdepartementet har stadfesta at seks italienske soldatar miste livet i angrepet. Men forsvarsminister Ignazio La Russa seier at angrepet ikkje vil skremme Italia ut av Afghanistan.
Han fortel at 10 italienske fallskjermsoldatar køyrde i to pansra bilar då sjølvmordsbombaren slo til.
Det er rundt 3250 italienske soldatar i Afghanistan.
Dette er eitt av dei verste enkeltangrepa mot dei over 100.000 utanlandske soldatane i Afghanistan sidan krigen starta for snart åtte år sidan.
Til saman 365 utanlandske soldatar frå USA og NATO er drepne i Afghanistan hittil i år.