Protestleiar blir ny statsminister

Onsdag blei den nye overgangsregjeringa presentert for tusenvis av spente ukrainarar på Uavhengigheitsplassen i Kiev.

Den nye statsministeren Jatsenjuk var ein av dei framste opposisjonsleiarane under demonstrasjonane i Kiev, som resulterte i at president Viktor Janukovitsj blei avsett laurdag førre veke.

Olkesander Sjlapak er utpeika som ny finansminister, medan Andrij Desjtsjytsja er lansert som den nye utanriksministeren i landet.

Krev ei lydhøyr regjering

Valet av Jatsenuk som den nye statsministeren var som venta.

Den 39 år gamle juristen og tidlegare økonomiministeren og utanriksministeren er leiaren av Fedrelandspartiet til Julia Timosjenko.

I 2010 prøvde han seg som presidentkandidat, men fekk under sju prosent oppslutnad.

Stemninga blant demonstrantane i den ukrainske hovudstaden har vore både avventande, skeptisk og optimistisk i forkant av den varsla presentasjonen av ei overgangsregjering.

Kravet om at dei nye makthavarane lyttar til og styrer på vegne av folket blei onsdag føremiddag markert med nedskjering av over hundre meter med metallgjerder som omringa parlamentsbygget i byen.

I kveld er det håp og optimisme som er mest synleg i folkehavet som har møtt opp på Uavhengigheitsplassen, sentrum for demonstrasjonane den siste tida.

(Saka held fram under biletet)

Ventar på ja frå Parlamentet

Med tende stearinlys venta fleire tusen ukrainarar onsdag i håp og spenning på kven som no skal styra landet.

På scenen blei det lese opp talar og oppmodingar som appellerer til fedrelandskjensla. Nasjonalsangen har runga, og jubelen og applausen sat laust då den nye regjeringa omsider blei kunngjort.

Overgangsregjeringa skal styra landet fram til ei ny regjering er på plass etter nyvalet den 25. mai.

Ukrainarar flest ønskjer no at situasjonen skal roa seg, og at dramatikken og tragedien blir erstatta med ein normal tilstand.

Nasjonalforsamlinga vedtok tysdag å utsetja tillitsvoteringa over den nye regjeringa til torsdag. Dei nye makthavarane blir dermed presentert for folket før dei har fått den formelle velsigninga frå parlamentsmedlemmene.

Årsaka til det er at politikarane ser behovet for å ha demonstrantane i ryggen for å oppnå ei styringsdyktig regjering.

Brende: – Må ta eit oppgjer med korrupsjonen

Utanriksministeren i Noreg, Børge Brende (H) meiner Jatsenjuk har fått eit viktig oppdrag.

– No må han begynna å leggja grunnlaget for økonomiske reformer og ta et oppgjer med korrupsjonskulturen i Ukraina. Det er ikkje lenger oligarkane sine interesser som skal vera tunga på vektskåla, men folket sine interesser, seier Brende til NTB.

Dei 28 forsvarsministrane i NATO vedtok onsdag eit felles utsegn om Ukraina i Brussel.

Alliansen understrekar behovet for ein inkluderande politisk prosess i Ukraina «basert på demokratiske verdiar, respekt for menneskerettane, minoritetar og rettsstaten».

– Sett i lys av dei tragiske hendingane, er opne, demokratiske og etterrettelege institusjonar no avgjerande for Ukraina si framtid, skriv ministrane.

Etterlyst internasjonalt

Uroa i landet starta i november i fjor, då presidenten Viktor Janukovitsj vraka ein handels- og samarbeidsavtale med EU like før signeringa, til fordel for ein liknande avtale med Russland.

Laurdag førre veke la Janukovitsj på flukt og blei avsett av nasjonalforsamlinga.

Eks-presidentener etterlyst internasjonalt for massedrap på sivile, opplyser påtalemakta i Ukraina onsdag. Det er uklart kvar han oppheld seg, men ifølgje den fungerande riksadvokaten er Janukovitsj framleis på ukrainsk jord.

Dei folkevalde har varsla at dei vil senda Janukovitsj til Den internasjonale straffedomstolen (ICC) så snart han er pågripen.

I tillegg til Janukovitsj er også administrasjonssjefen Andrij Kljujev, ein tidlegare innanriksminister og ein tidlegare riksadvokat blant dei som er mistenkte for drap under opprøret i landet dei siste tre månadene.