Åtte «uvurderlege» smykke borte – diamantkrone funnen ved Louvre

Ei krone med diamantar og smaragdar er funnen øydelagd nær Louvre i Paris, etter eit tjuveri søndag morgon.

Det seier kjelder med kjennskap til saka til nyheitsbyrået AFP.

Tidlegare søndag opplyste Frankrikes kulturminister Rachida Dati at eit smykke hadde blitt funne i nærleiken.

Søndag kveld stadfester kulturdepartementet at åtte smykkegjenstandar av «uvurderleg verdi» er borte. Ein gjenstand har kome til rette.

– To høgsikkerheitsmontrar blei brote inn i. Åtte gjenstandar vert stolen, heiter det i meldinga.

Departementet seier også at diamantkrona er funnen.

Den franske påtalemakta seier søndag kveld at dei søker etter fire personar som skal ha brote seg inn i museet.

Den franske presidenten seier søndag kveld at dei som står bak skal takast.

– Innbrotet er eit angrep på vår kulturarv. Vi vil få tilbake kunstverka, og dei som står bak skal stillast for retten, skriv president Emmanuel Macron på X.

Utførte ranet på sju minutt

Ifølge Frankrikes innanriksminister Laurent Nunez brukte dei motorsager til å knuse vindauge i rommet dei sikta seg inn mot, før dei stal smykka og rømde.

Nunez omtalar smykka som «uvurderlege», ifølge Le Figaro. Men det er førebels uklart kor stor verdien på dei stolne gjenstandane er.

Han seier det var tre eller fire personar som stod bak ranet, og at dei retta seg mot Apollon-galleriet.

Heile ranet skal ha vore over på berre sju minutt.

Rømte med motorsykkel

Det skal vere snakk om mellom anna eit halskjede, ei brosje og ein tiara, ifølge franske medium.

Det er førebels uklart kor stor verdien på dei stolne gjenstandane er.

Ekspertar meiner dei kan vere verd fleire millionar euro. Museet kjem til å halde stengt resten av dagen, ifølge ei melding frå leiinga.

Ingen personar skal ha blitt skadde.

Vitne har fortalt at dei høyrde støy frå området kort tid etter opninga, melder franske medium.

Det var Frankrikes kulturminister Rachida Dati som meldte om hendinga på X.

Politiet etterforskar saka. Det er enno uklart korleis rana gjekk føre seg, og kven som står bak.

Ifølge Le Parisien skal gjerningspersonane ha rømt frå staden på motorsykkel.

Verdas største kunstmuseum

Louvre-museet er rekna som det største kunstmuseet i verda. Det har om lag 30.000 besøkande kvar einaste dag.

Det er rundt 73.000 kvadratmeter utstillingsareal. Det utgjer meir enn ti fotballbaner til saman.

Bygget blei oppført i 1546 som slott for den franske kongefamilien.

Kong Frans I, som budde der fyrst, var ein ivrig kunstsamlar og ønskte å vise fram kunstverka sine.

Gjennom fleire hundreår utvida etterfølgande kongar samlinga.

Etter den franske revolusjonen blei kunstsamlinga opna for allmenta.

I dag rommar museet over 35.000 verk, mellom anna Mona Lisa av Leonardo da Vinci.

Interessert i meir utanriks? Lytt til redaksjonens podkast: