Det er vanskeleg å få verifisert opplysningane frå uavhengige kjelder. Det offisielle syriske nyheitsbyrået SANA melder at ein sjølvmordsbombar har sprengt seg i lufta i byen Sahl al-Ghab i Hama-provinsen, men seier berre at to innbyggjarar vart drepne og fleire såra.
Talsmann Rami Abdelrahman i opprørsgruppa Syrian Observatoruy for Human Rights, som har base i London, seier at ein opprørar frå Nssura-fronten køyrde bilen sin til sentrum av Sahl al-Ghab, der han sprengde seg sjølv i lufta. I kjølvatnet fylgde fleire nye eksplosjonar, heiter det.
Om det er tilfelle at over 50 regjeringssoldatar er drepne, kan dette vere eitt av dei verste enkeltangrepa mot Assad-regimet sidan opprøret starta.
– Base for regjeringssoldatar
Abdelrahman seier at senteret som vart ramma av eksplosjonane var ein base for regjeringsstyrkane i området og regjeringsvenlege militssoldatar, og at minst 50 av dei er drepne.
Den same opprørsgruppa opplyser samstundes at minst 20 syriske opprørarar er drepne i eit flyangrep mot byen Haram i provinsen Idlib nordvest i Syria. I alt er minst 105 menneske drepne i kampar måndag, og av dei er minst 55 syriske regjeringssoldatar, ifølgje gruppa.
Opprørarane har kontroll over store delar av Idlid-provinsen, som grensar til Tyrkia. Dei syriske regjeringsstyrkane har trekt seg tilbake frå området, men det blir gjennomført luftangrep mot opprørsstillingar.
Eksplosjonar i Damaskus
Også i Nazzeh-distriktet i hovudstaden Damaskus vart det i dag meldt om kraftige eksplosjonar. Det statlege fjernsynet melder at fire menneske vart drepne og fleire titals skadde. Det skal ha vore snakk om ei tidsinnstilt bombe som var plassert inne i ein bil.
Andre kjelder seier at minst 11 menneske er drepne i eksplosjonane.
Det er også meldt om kampar og eksplosjonar fleire andre stader i Syria, men det er uklart kor mange som har mist livet. De har vore kampar blant anna i Aleppo og i den palestinske flyktningleiren Yarmuk i utkanten av Damaskus. I denne leiren er over 30 menneske drepne i løpet av søndag og måndag.
I Aleppo har dei hardaste kampane vore i bydelen Zahraa.
– Ei heil veke i frykt
– I ei heil veke no har vi levd i frykt. Vi høyrer alle moglege typar våpen, maskingevær, tanks, eksplosjonar. Kampane før soloppgang måndag var dei verste vi har opplevd tidleg, seier Samir, ein 37 år gammal farmasøyt frå Zahraa, til det franske nyheitsbyrået AFP.
Samstundes går det føre seg samtalar mellom fleire av dei ulike opprørsgruppene i Syria, men det er førebels ikkje noko som tyder på at dei greier å oppnå målet om å samle seg i ein felles front.
Usemja om Syria blant dei faste medlemslanda i Tryggingsrådet i FN held også fram. Russlands utanriksminister Sergej Lavrov hamra laus på dei vestlege landa i dag for deira støtte til opprørsgruppene i landet.
Diplomatisk stillstand
Lavrov meiner at USA og andre vestlege land oppeldar opprørarane til vidare kamp, i staden for å presse dei til forhandlingsbordet.
Lavrov møtte i dag leiaren for Den arabiske liga, Nabil al-Arabi, men det skal ikkje ha kome noko konstruktivt ut av samtalane, ifølgje ei kjelde i Den arabiske liga.
Opprørsgruppa Observatory for Human Rights seier at minst 36.000 menneske er drepne sidan opprøret mot regimet til Bashar al-Assad starta i mars 2011.