Den åtte meter høge statuen på The Magnificent Mile på Michigan Avenue i sentrum av Chigaco har naturleg nok vekt stor oppsikt. Kunstnaren Seward Johnson står bak kunstverket, og det skal stå utstilt på The Magnificent Mile fram til neste vår.
Dette området blir ofte brukt til å vise fram spektakulære kunstverk, og det er ikkje første gongen Seward Johnson har presentert sine verk her.
Blafrande kjole
Det verdskjende motivet, der kjolen til Monroe bles opp og viser undertøyet, har kunstnaren henta frå filmen "Seven Year Itch".
Statuen har alt blitt eit ynda foto-objekt både blant turistar og fastbuande i storbyen ved breidda av Michigan-sjøen. Folk stiller seg opp og blir fotograferte ved beina til Monroe, og påfallande mange vender blikket opp under kjolen under fotoseansen.
Noreg har også sin Marilyn Monroe-statue, men denne statuen er langt mindre prangande enn i Chigaco. Dette sjølv om også skulpturen til bilethoggaren Nils Aas i Haugesund var omstridd då han vart avduka 31. august 1994.
Filmbyen Haugesund
Men i dag har statuen vorte ein populær del av bybiletet i Haugesund, og er også med på å marknadsføre den store filmfestivalen, som blir halden i august kvart år, og Haugesund som filmby.
Marilyn Monroe var aldri i Haugesund, men det var lenge ein levande teori at faren hennar var frå denne byen. Seinare har det kome fram at bestefaren hennar utvandra frå Stavanger i 1880.
Fødenamnet til Marilyn Monroe var Norma Jean Mortensen.
Området