Demonstrasjonane i landet skjedde i samband med 20-årsdagen for at landet erklærte seg uavhengig frå Sovjetunionen.
Dagen vart feira over heile det oljerike landet fredag. Men i byen Zjanaozen vest i landet kom det til harde samanstøyt mellom ei gruppe oppsagte oljearbeidarar og politi. Mange er drepne, og endå fleire er såra.
Demonstrasjonane skal ha starta igjen laurdag.
Så mange som 70 kan vere drepne
Offisielle tal frå styresmaktene i landet seier at minst 11 vart drepne i samanstøyta mellom demonstrantane og politiet. Men den opposisjonelle fjernsynskanalen K-plus melder at så mange som 50 er drepne i samanstøyta. Vitner til TV-kanalen seier at ei lita jente vart skoten i hovudet.
Ifølgje Russia Today har bloggarar rapportert at 70 er omkomne, og så mange som 500 skadde.
Situasjonen i Zjanoazen har vore spent i fleire månadar etter at oljearbeidarar gjekk til streik med krav om betre arbeidstilhøve.
Fleire bygningar skal ha blitt brent ned til grunne under demonstrasjonane, mellom anna kontora til dei lokale styresmaktene og eit hotell. Demonstrantane satte også fyr på mange bilar og ein politibuss, og skal ha plyndra minibankar i byen.
Sjå video frå demonstrasjonane i Zjanaozen under:
Unnatakstilstand
Ifølgje Reuters har presidenten i Kasakhstan, Nursultan Nazarbajev, erklært unnatakstilstand i landet. Det er også ilagt portforbod for innbyggjarane i byen Zjanaozen.
På dei offisielle nettsidene til presidenten er det lagt ned eit forbod mot einkvar form for streik og offentlege protestar. Bruk av opptaksutstyr som videokamera er også blitt ulovleg i byen.
Vanskeleg å skaffe informasjon
Det er vanskeleg å få informasjon ut av landet fordi styresmaktene har streng kontroll på informasjonsflyten. Bloggarar som rapporterte om hendinga skal i dag ha blitt arrestert av styresmaktene. Youtube og mikrobloggingstenesta Twitter er også blitt blokkert i landet.
– Me får ikkje tilgang til Twitter i landet, skriv twitraren hefxno frå Kazakhstan, som har fått tilgang til tenesta via ein server i utlandet.
NRK.no følgjer situasjonen i Kasakhstan.