- Vulkanutbrotet er spennande

- Eg synest det er spennande, seier ho.

Mamma Anna Birna Prainsdottir veit ikkje om ho er heilt samd i det. Vulkanutbrotet sist veke gjorde at heile familiegarden Varmeli fekk eit oskelag over seg.

Huset, fjøset og heile området rundt vart dekt av eit tjukt lag med oske. Det 13-åringen synest er spennande, er for mamma litt meir alvorleg.

Ho kan fortelje om uro for framtida, fordi dei ikkje veit noko om kva som blir det neste. Kva retning vil vinden blåse? Kor lenge vil utbrotet halde fram? Vil vulkanen Katla også få utbrot?

• Les også: Flere forsikringsselskaper endrer praksis

Oskegjørma

Mora legg ikkje skjul på at ho er redd, men på den andre sida så har ho ikkje tid til å gå og tenkje på det heile tida.

Til det er det altfor mykje som skal gjerast. Dyra, som på denne tida skulle gå på beite ute på dei flate bøane her ute ved Atlanterhavet, er no stua saman inne i det tronge fjøset.

For dei kan ikkje sleppast ut i oska. På veg frå huset og ned til fjøset må vi gå gjennom oskegjørma, og Anna Birna kan fortelje at all beitemarka deira er dekt av oske.

• Les også: – Nesten ikke askeutslipp nå

- Vi toler ein støyt

På spørsmål om familien har tenkt på å kutte ut gardsdrifta på grunn av det som har skjedd, er ho kategorisk. Det kjem ikkje på tale.

Ho veit at mange har tankar om å gi opp gardsdrifta, det var trass alt ikkje så veldig lønsamt å vere bonde på Island før vulkanutbrotet heller. Men Anna Birna vil ikkje gi seg, sjølv om ho og resten av familien ikkje driv garden på heiltid.

- Vi islendingar er hardføre menneske. Vi toler ein støyt, seier ho og ler.

• Les også: 14,2 milliarder i lån til Island

Deltidsbønder

Familien er deltidsbønder, som så mange andre på sagaøya. Gardshuset blir nytta som ein bustad nummer to, medan familiebustaden ligg i tettstaden Vik i Myrdal.

Kalvane og sauene går til vanleg ute heile døgnet på denne tida av året, og der finn dei den maten dei treng. Men den situasjonen er radikalt endra.

No må dei sjå til dyra fleire gonger kvar dag, og det tek mykje tid å gjere reint etter oskenedfallet. Så i tida framover vil dei måtte bruke meir tid på garden enn dei normalt sett ville ha gjort.

• Les også: Enorme klimautslipp fra vulkanen

Ekstra fridagar

For 13 år gamle Ingveldur gjorde vulkanutbrotet at det vart nokre ekstra fridagar frå skulen.

Skulebygget i tettstaden Vik i Myrdal vart så nedgrisa av oske at elevane fekk fri dei tre første dagane denne veka, slik at det vart tid til ei skikkeleg reingjering både inne og ute.

Ho har aldri opplevd noko liknande før, og synest det er spennande at journalistar og tv-team frå store delar av verda fartar rundt i distriktet. Ho er flink i engelsk og svarar villig vekk på spørsmåla frå dei nyfikne nyheitsjegarane.

Heller ikkje Anna Birna har opplevd noko liknande før.

- Sist det var utbrot i Eyafjällajøkull var i 1823, og så gammal er eg ikkje, ler ho, og viser at humøret ikkje er langt unna trass i den vanskelege situasjonen vulkanutbrotet har skapt for mange familiar og lokalsamfunn på Island.

• Les også: Ny askesky tirsdag...